Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 593 Hüküm no: 737 Orijinal metin no: [92b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Durak Bey b. Mehmed’in, boşandığı karısı Âişe Hatun bt. Abdullah’a verdiği eşyaları hibe ettiği Mahmiye-i İstanbul’da Alayköşkü kurbunda Kareki Hüseyin Çelebi mahallesinde sâkin Durak Bey b. Mehmed nâm kimesne tarafından ikrâr-ı âti’l-beyâna vekîl olduğu mahalle-i mezbûre sâkinlerinden Ahmed Bey b. Abdurrahman ve Süleyman Çelebi b. Abdullah nâm kimesneler şehâdetleriyle şer‘an sâbit olan Nasuh Bey b. Yusuf nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda müvekkil-i mezbûrun zevce-i menkûhası Âişe Hâtun bt. Abdullah tarafından tasdîk-i câ’i’l-beyâna nehc-i şer‘î ve tarîk-i mer‘î üzre sâbitü’l-vekâle vekîl olan fahrü’l-akrân Mehmed Çelebi b. eş-Şeyh Aydın Efendi mahzarında ikrâr ve takrîr-i kelâm edip müvekkil-i mezbûr Durak Bey silk-i mülk-i sahîhinde münselik olan eşyâsından iki beledî döşek ve bir minder ve üç yemeni yorgan ve üç çuka yastık ve iki aba yastık ve iki müsta‘mel kilim ve Şile kilimi ve birisi beyaz birisi kırmızı iki müsta‘mel velense ve üç müsta‘mel Yanbolu kebesi ve beş sahan ve iki …? ve kapaklarıyla üç tencere ve iki güğüm ve bir leğen ve bir ibrik ve bir baklava tepsisi ve iki ibriği ve iki tava ve dört çift müsta‘mel don ve gömlek ve bir keçe ve bir şamdan ve üç müsta‘mel kaban ve iki alaca çarşafını zevce-i menkûhası müvekkile-i mezbûre Âişe Hâtun’a hibe-i sahîha-i şer‘iyye ile hibe ve teslîm edip ol dahi meclis-i hibede ittihâb ve kabûl ve kabz ve tesellüm eyledi, ba‘de’l-yevm zikr olunan eşyâ müvekkile-i mezbûre Âişe Hâtun’un mülk-i mevhûbu olup eşyâ-i mezkûrda müvekkilim mezbûr Durak Bey’in kat‘â alâka ve medhali kalmamışdır dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Es-Sâbikūn.