Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 594 Hüküm no: 738 Orijinal metin no: [92b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Atanaş v. Karoni’nin, Mustafa Bey b. Cafer’in reâyâsı olmadığı Erbâb-ı timardan Mustafa Bey b. Cafer nâm kimesne meclis-i şer‘-i hatîr-i lâzımü’t-tevkīrde Atanaş v. Karoni nâm zimmî muvâcehesinde üzerine da‘vâ ve takrîr-i kelâm edip merkūm [A]tanaş vilâyet-i Mora’da Kartine kazâsına tâbi‘ Lazta nâm karye ve gayrıdan berât-ı âlîşân ile mutasarrıf olduğum timarımın re‘âyâsından olmağla târih-i kitâb senesinde üzerine edâsı lâzım iki buçuk guruş ispençemi taleb eylediğimde vermede ta‘annüd eder suâl olunup alıverilmesi matlûbumdur dedikde gıbbe’s-suâl merkūm Atanaş cevâbında ben İstanbul’da Yedikule’de sâkin olup kendi gelen yava-i Akkirman defterine tâbi‘ kefere re‘âyâsından kayd olunup üzerime lâzım gelen cizye ve sâir tekâlîf-i mahmiye-i mezbûrda edâ edegelmiş[im]dir deyû mühürlü sûret-i defter-i cedîd-i hâkānî mûcebince emr-i şerîf-i âlîşân ibrâz edip feth ve kırâat ve istintâk olundukda mazmûnu takrîr-i meşrûhuna mutâbık bulunup mezbûr Mustafa Bey dahi ikrâr etmeğin mûcebince müdde‘î-i mezbûr Mustafa Bey bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çavuş b. Mirza, Hasan Çelebi b. Ahmed, İbrahim Çelebi b. Mehmed, Hüseyin b. Ebûbekir, İbrahim Bey b. Mehmed.