Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 599 Hüküm no: 741 Orijinal metin no: [93b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Çelebi’nin, câriyesi Kerime’yi âzat ettiği Mahmiye-i İstanbul’da Çakır Ağa mahallesinde sâkin es-Seyyid Mahmud Çelebi b. es-Seyyid Hüseyin nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de ikrâr ve takrîr-i kelâm edip bana rıkkıyyetini mu‘terife olan orta boylu, açık kaşlı, kara gözlü, Gürciyyetü’l-asl bâ‘isetü’l-vesîka Kerime bt. Abdullah nâm câriye-i memlûkemi hasbeten lillâhi te‘âlâ ve taleben li merzâti Rabbi’l-a‘lâ tahrîr ve i‘tâk ve silk-i harâir-i asliyyâta idrâc ve ilhâk eyledim ba‘de’l-yevm mezbûre Kerime sâir harâir-i asliyyât gibi hürre olup üzerinde velâdan gayrı hak ve alâkam kalmadı dedikde mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Ramazâni’l-mübârek li sene seb‘a ve seb‘în ve elf. Şuhûdü’l-hâl: El-Hâc Rıdvan b. Abdullah, aşçı Hüseyin Beşe, Kabak İbrahim b. ( ), İbrahim Çelebi b. Ahmed, Hasan Çelebi b. Ahmed, gemici Mustafa b. ( ) muhzır.