Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 600 Hüküm no: 742 Orijinal metin no: [93b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. Hasan’ın, çalınan parasının Mehmed Bey’de olduğu iddiasını ispat edemediği Hâssa bostancılarından Ahmed Bey b. Hasan nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bostancı tâifesinden bâ‘isü’l-kitâb Mehmed Bey b. Ahmed Bey nâm kimesne mahzarında üzerine da‘vâ ve takrîr-i kelâm edip sâbıkan hizmetkârım olan hâzır bi’l-meclis Mehmed b. Abdullah nâm kimesne mahmiye-i İstanbul’da hadîka-i hâssa-i sultânîde berberhâne demekle ma‘rûf odamda olan sepetimi târih-i kitâbdan ( ) gün mukaddem fuzûlen açıp içinde olan yüz seksen guruşumu ahz u kabz ettiğinden sonra mezbûr Mehmed Bey’e teslîm edip mezbûr Mehmed Bey dahi yedinden ahz u kabz etmişdir mezbûr Mehmed Bey’den gāsıb olmağla suâl olunup meblağ-ı mezbûrun aynı mevcûd ise aynı bana teslîm, müstehlek ise mislini zâmin olmak üzre merkūm Mehmed Bey’e tenbîh olunmak matlûbumdur dedikde, gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müdde‘î-i mezbûrun yüz seksen guruşunu hizmetkârı merkūm Mehmed yedinden vech-i mübeyyen üzre ahz u kabz etmeyip elân üzerine aynı red veya mislini zâmin lâzım olmadığına mezbûr Mehmed Bey’e yemîn teklîf olundukda ol dahi alâ vefki’l-mes’ûl yemîn billâhi aliyyi’l-a‘lâ etmeğin mûcebince müdde‘î-i mezbûr bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Ömer Çavuş b. Mustafa el-Mübâşir, fahrü’l-akrân ekmekçi kethüdâsı Mehmed Çelebi, Hasan Beşe b. Çukadâr, İbrahim Çelebi b. Ahmed, Hasan Çelebi b. Ahmed.