Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 602 Hüküm no: 746 Orijinal metin no: [94a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühani bt. Hüseyin’in, es-Seyyid Yahya b. Mustafa’ya borcu için rehin verdiği eşyalar ile ilgili davada tarafların anlaşamadığı Mahmiye-i İstanbul’da Gedikpaşa mahallesinde sâkine bâ‘isetü’l-kitâb Ümmühâni bt. Hüseyin nâm hâtun meclis-i şer‘de es-Seyyid Yahya b. Mustafa nâm kimesne mahzarında üzerine da‘vâ ve takrîr-i kelâm edip mezbûr es-Seyyid Yahya Çelebi’ye deynim olan on guruş mukābelesinde zerdus ta‘bîr olunur yetmiş miskāl iki sırma kolan kuşağı rehin ve teslîm edip mezbûr es-Seyyid Yahya Çelebi dahi irtihân ve tesellüm etmişidi suâl olunup ihkāk-ı hak olunmak matlûbumdur dedikde gıbbe’s-suâl mezbûr es-Seyyid Yahya Çelebi cevâbında müdde‘iyye-i mezbûrenin deyn-i mezbûru için bana rehin ve teslîm ben dahi irtihân ve kabz ve tesellüm ettiğimde iki sırma kolan kuşak için yirmişer miskāl olup emri ile on guruşa Ahmed’e bey‘ ile istihlâk eyledim dedikde gıbbe’s-suâl ve’l-inkâr müdde‘iyye-i mezbûreden ziyâde da‘vâsı için ve mezbûr es-Seyyid Yahya Çelebi’den müdde‘iyye-i mezbûrenin vech-i muharrer üzre emrine beyyine taleb olundukda her biri ityân-ı beyyineden izhâr-ı acz ile âharı istihlâf etmeğin mezbûrân es-Seyyid Yahya Çelebi ve Ümmühâni’den her birine vech-i şer‘î üzre yemîn teklîf olundukda anlar dahi alâ vefkayi’l-mes’ûl yemîn billâhi’l-aliyyi’l-a‘lâ etmeğin mûcebince ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’s-sânî min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Ali Çavuş b. Mustafa, İbrahim Çelebi b. Sefer, Hacı Hüseyin b. Hasan, İbrahim Çelebi b. Ahmed.