Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 602 Hüküm no: 747 Orijinal metin no: [94a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Lala Hüseyin Paşa Vakfı’na mütevelli olan Mustafa Çelebi’nin yerine oğlu İbrahim’i mütevelli tayin ettiği Mahmiye-i İstanbul’da Nişancı Paşa-yı Atîk mahallesinde sâkin iken bundan akdem vefât eden merhûm Lala Hüseyin Paşa’nın mu‘takı müteveffâ Yusuf b. Abdullah’ın oğlu olup merhûm-ı mezbûrun evkāfına meşrûtiyyet üzre mütevellî olan Mustafa Çelebi nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de merhûm-ı mezbûrun âhar mu‘takı müteveffâ Mustafa’nın oğlu müteveffâ Ahmed’in oğlu râfi‘ü’l-kitâb İbrahim nâm kimesne mahzarında ikrâr ve takrîr-i kelâm edip ben pîr u fânî olup umûr-ı tevliyyeti ikāmete kādir olmadığımdan mâ‘adâ mezbûr İbrahim tevliyyet-i mezbûreyi hakk-ı meşrûh olmak üzre berât dahi ettirmeğin şart-ı vâkıf üzre cihet-i tevliyyet olan yevmî on akçenin altı akçesini ben alıp, dört akçesini mezbûr İbrahim almak üzre mezbûr İbrahim’i yerime kāimmakām nasb ve ta‘yîn edip ol dahi kabûl ve merâsimini edâya ta‘ahhüd eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-âşir min Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Efendi b. Sefer el-İmâm, Ömer Ağa b. Mehmed, Ramazan Efendi b. Mustafa el-İmâm, Hüseyin Halîfe b. Abdülbâkī, Halil Efendi b. Musa, Hüseyin Çelebi [b.] Mehmed