Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 603 Hüküm no: 748 Orijinal metin no: [94a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Süleyman’ın vakıf arazisi üzerine yaptığı binanın keşfi İşbu bâ‘isü’l-kitâb fahrü’l-emâsil ve’l-akrân Ahmed Ağa b. Süleyman nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda takrîr-i kelâm ve ta‘bîr ani’l-merâm edip merhûme Cennet bt. Server nâm sâhibü’l-hayrın gallesi mahmiye-i Kostantıniyye hısnı ebvâbından Kumkapı dâhilinde Nişancı Paşa-yı Atîk mahallesi câmi‘-i şerîfinde imâm olanlara meşrûta vakfı olup mahalle-i mezbûrede vâki‘ bir tarafdan kâtib Mustafa Çelebi mülkü ve iki tarafdan tarîk-i hâs ve bir tarafdan tarîk-i âm ile mahdûd bi hesâb-ı terbî‘î yüz altmış beş zirâ‘ arsa üzerine mebnî sene de iki yüz akçe mukāta‘a ile tasarrufumda olan menzil bin yetmiş senesi Zilka‘desi’nde vâki‘ harîk-i azîmde bi’l-külliye muhterik olup arsa-i sırfa kalmağla müceddeden binâ olunmak lâzım gelmeğin câmi‘-i şerîf-i mezkûrda imâm olup vakf-ı mezbûrun bi’l-fi’l mütevellîsi olan umdetü’l-akrânı Mehmed Efendi b. Süleyman arsa-i mezbûre üzerine yine ke’l-evvel malım ile mülküm olmak üzre kendi nefsim için müceddeden binâya bana izin vermeğin ben dahi vech-i muharrer üzre malım ile mülküm olmak üzre nefsim için üzerine müceddeden bir menzil binâ etmişimdir hâlâ savb-ı şer‘-i mutahhardan üzerine varılıp masrûfum tahmîn-i sahîh ile tahmîn olunmak matlûbumdur dedikde savb-ı şer‘-i hatîrden bu fakīr hâssa mi‘mârlardan ve üstâd Ali Halîfe b. Abdullah el-Bursevî ve zeyl-i rakīmde isimleri terkīm olunup ebniye ve sukūf ahvâline ıttılâ‘-ı tâm ve kemâl-i vukūfu olan müslimîn ile üzerine varıp mi‘mâr-ı mezbûr mütevellî-i mûmâ-ileyh Mehmed Efendi muvâcehesinde mesâha eyledikde tûlen ve arzen bi hesâb-ı terbî‘î yüz sekiz buçuk zirâ‘ sakfın her zirâ‘ı ellişer akçeden beş bin dört yüz yirmi beş akçe ve bi hesâb-ı mezbûr yüz otuz altı zirâ‘ şatrancî tavanın her zirâ‘ı kırkar akçeden beş bin dört yüz kırk akçe ve bi hesâb-ı merkūm iki yüz otuz üç zirâ‘ tahta döşemenin her zirâ‘ı yirmi beşer akçeden beş bin sekiz yüz yirmi beş akçe ve dokuz rahneden masnû‘ beş aded camın her bir camı yüz kırk akçeden yedi yüz akçe ve bi hesâb-ı mezbûr iki yüz on dört zirâ‘ dolma duvarın her zirâ‘ı kırkar akçeden sekiz bin beş yüz altmış akçe ve çıkrık işi beş aded pencere üç yüz akçeden bin beş yüz akçe ve dört aded sandık dolap üçer yüz akçeden bin iki yüz akçe ve iki mükemmel masandra bin akçeden iki bin akçe ve yirmi zirâ‘ tavanın her zirâ‘ı yirmişer akçeden dört yüz akçe ve iki astar-ı cam yüzer akçeden iki yüz akçe ve altışar tahta billurdan masnû‘ dört camın her bir camı yüz akçeden dört yüz akçe ve bir sâde oda kapısı yüz elli akçe ve bir kemer oda kapısı üç yüz akçe ve iki mükemmel oda ocağı bin akçeden iki bin akçe ve altı hurda İznikmid direği ellişer akçeden üç yüz akçe ve üçer zirâ‘ kert? mıhla âhen trabzan altmışar akçeden üç yüz altmış akçe ve iki geçme koltuk trabzanı doksanar akçeden yüz seksen akçe ve çıkrık işi bir nîm pencere yüz elli akçe ve bi hesâb-ı merkūm kırk beş zirâ‘ sâde tavanın her zirâ‘ı otuzar akçeden bin üç yüz akçe ve elli akçe ve dokuz basamaklı bir nerdübân dört yüz def‘a on iki basamaklı bir nerdübân beş yüz akçe ve bir sagīr demir pencere yüz elli akçe ve bi hesâb-ı mezkûr yüz altmış zirâ‘ taş duvarın her zirâ‘ı altmışar akçeden dokuz bin altı yüz akçe ve yedi kebîr İznikmid direği yüz yirmişer akçeden sekiz yüz kırk akçe ve iki çubuk taban yüz yirmişer akçeden iki yüz kırk akçe ve bi hesâb-ı mastûr yüz otuz dört zirâ‘ tahta perdenin her zirâ‘ı yirmişer akçeden iki bin altı yüz seksen akçe ve sagīr kemer câmeşûy ocağı iki yüz akçe ve bir kenîf beş yüz akçe ve bir orta kapı iki yüz akçe dört tahtadan masnû‘ Lefkeli raf yüz yirmi akçe ve bi hesâb-ı mezkûr doksan üç buçuk zirâ‘ taş kaldırımın her zirâ‘ı on ikişer akçeden bin yüz yirmi iki akçe ve bir sokak kapısı beş yüz akçe cem‘an elli üç bin dört yüz doksan iki akçe ile ancak olur [94b] noksân ile binâ mümkün değildir meblağ-ı mezbûrdan sâbıkan tahmîn olunan bin dört yüz akçe nukz bahâsı ifrâk olunucak elli bin doksan iki akçe masrûfu kalır deyû mi‘mâr-ı mezbûr ile müslimîn-i mezkûrîn icmâ‘ ve ittifâk etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Recebi’l-mürecceb li sene seb‘a ve seb‘în ve elf. Şuhûdü’l-hâl: Fahrü’l-eimme Mehmed Efendi b. Sefer, fahrü’l-akrân ve’l-ekfâ hammâmî Ömer Ağa b. ( ), umdetü’l-akrân İmâm Ömer Efendi [b.] Yusuf.