Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 604 Hüküm no: 749 Orijinal metin no: [94b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. İbrahim’in, kendine ait arsa hissesini Veli Beşe b. Mehmed’e sattığı Mahmiye-i İstanbul’da Unkapanı dâhilinde Papasoğlu mahallesinde sâkine Sâliha bt. İbrahim nâm hâtun meclis-i şer‘-i hatîrde bâ‘isü’l-kitâb Veli Beşe b. Mehmed mahzarında ikrâr ve takrîr-i kelâm edip arsasının senede Kerime Hâtun vakfı’na yedi yüz elli akçe mukāta‘ası olup arsa-i mezbûrenin nısfı benim ve nısf-ı âharı li ebeveyn kız karındaşım oğlu Musa’nın taht-ı tasarrufunda olmağın kendi hissem üzerinde vâki‘ binâ akd-i âtî sudûruna değin yedimde mülk ve hakkım olup mahalle-i mezkûrda vâki‘ bir tarafdan Mustafa Çelebi menzili ve bir tarafdan değirmen arsası ve bir tarafdan mezkûre Kerime Hâtun vakfı olan kuyumcu dükkânları ve bir tarafdan tarîk-i âm ile mahdûd iki bâb fevkānî oda ve dehlizi ve müşterek su kuyusu ve mahzeni ve kenîfi müştemil menzilin mülküm olan binâsı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezkûr Veli Beşe’ye dört yüz esedî guruşa bey‘ ve teslîm ve kabz-ı semen edip ol dahi vech-i muharrer üzre iştirâ ve tesellüm ve kabûl edip arsasını dahi vakf-ı mezbûr mütevellîsi izni ile meccânen mezkûre, mezkûr Veli Beşe’ye ferâğ ve tefvîz ol dahi tefevvuz ve kabûl eyledi, ba‘de’l-yevm menzil-i mezkûrun binâsı mezkûr Veli Beşe’nin mülk ve arsası hakk-ı müfevvazı olmuşdur, benim alâka ve medhalim kalmamışdır dedikde gıbbe’t-tasdîk. Fi’l-yevmi’s-sâdis ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Yusuf Efendi b. Süleyman el-İmâm, Hacı Ali b. Mehmed, Himmet b. Mehmed, İsmail b. Hüseyin, Hacı Mustafa b. Hızır, Nasuh b. Muharrem, Mustafa Beşe.