Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 605 Hüküm no: 750 Orijinal metin no: [94b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. İstati’nin, Yorgi v. Nikola’daki alacağını iki ay ertelediği Meyhâneci tâifesinden Yorgi v. İstati nâm zimmî meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda sâbıkan destgâhdârı olan Yorgi v. Nikola muvâcehesinde ikrâr ve takrîr-i kelâm edip mezbûr Yorgi v. Nikola sâbıkan destgâhdârı olup sermâyem yedinde olmağla bundan akdem muhâsebesini gördüğümde bi gayrı hakkın mesârifine sarf edip istihlâk etmekle zimmetinde sekiz bin râyic fi’l-vakt akçe hakkı zuhûr eyledikde mezbûr Yorgi v. Nikola meblağ-ı mezkûr sekiz bin akçeyi hâlâ bana edâya iktidârı olmayıp te’cîle tâlib olmağın meblağ-ı mezkûr sekiz bin akçeyi târih-i kitâbdan altmış gün tamâmına değin te’hîr eyledim dedikde mezbûr Yorgi v. Nikola mukırr-ı merkūm Yorgi v. İstati’nin cemî‘ kelimâtını vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Fahrü’l-eşbâh Mustafa Çavuş b. Abdullah, İbrahim Çelebi b. Mehmed, Hüseyin b. Ahmed, Resul [b.] Rıdvan.