Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 606 Hüküm no: 752 Orijinal metin no: [94b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmine bt. Sefer’in câriyesi Muammer’i vasiyet yoluyla âzat ettiği Mahmiye-i İstanbul’da Mirahor mahallesi sâkinelerinden Âmine bt. Sefer nâm hâtun tarafından husûs-ı âti’l-beyâna vekîl olup zâtı ma‘rifet-i şer‘iyye ile ârifân olan Zekeriya b. Mehmed ve Mehmed b. Mustafa nâm kimesneler şehâdetleriyle şer‘an sâbit olan Yusuf Çelebi b. Abdullah nâm kimesne meclis-i şer‘-i hatîr-i lâzımü’t-tevkīrde bi’l-vekâle ikrâr ve takrîr edip müvekkilem mezbûre Âmine kendiye rıkkıyyeti mu‘terife olan açık kaşlı, koyun elâ gözlü, orta boylu, Rûsiyyetü’l-asl Muammer bt. Abdullah nâm câriyesini vefâtından kırk gün mukaddem âzâd olmak üzre tedbîr-i mukayyed ile müdebbere edip bi emrillâhi te‘âlâ vefât ettiğinde eşyâ-i memlûkesinden bir beledî döşek ve bir minder ve iki yastık ve bir yan keçesi ve iki sahan ve tencere ve bir yorgan merkūme Muammer’e verile deyû vasiyyet edip tenfîze beni vasiyy-i muhtâr nasb ve ta‘yîn eyledi dedikde mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Ramazâni’l-mübârek li sene seb‘a ve seb‘în ve elf. Şuhûdü’l-hâl: İbrahim b. Mehmed, Ali b. Abdullah, Hasan Çelebi b. Ahmed, Kasım Çelebi b. Mehmed, İbrahim Çelebi b. Ahmed.