Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 606 Hüküm no: 753 Orijinal metin no: [94b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Emetullah’ın terekesini zabt eden babası Ali Çelebi’den Anneannesi Fâtıma’ya altıda bir hissenin verilmesi Mahmiye-i İstanbul’da Arabacı Bayezid mahallesinde sâkine iken bundan akdem vefât eden Emetullah nâm sagīrenin vârisi babası Ali Çelebi b. Şaban ile annesinin anası Fâtıma nâm hâtuna münhasıra olduğu şer‘an zâhir ve mütehakkik oldukdan sonra merkūme Fâtıma Hâtun’un sadrî kebîr oğlu ve tarafından husûs-ı âti’l-beyâna vekîl-i müsecceli olan Mehmed Çelebi b. Mustafa Efendi meclis-i şer‘-i hatîrde müteveffât-ı mezbûrenin terekesine vâzı‘ü’l-yed olan babası merkūm Ali Çelebi mahzarında bi’l-vekâle üzerine da‘vâ ve takrîr-i kelâm edip müteveffât-ı mezbûre Emetullah’ın ber mûceb-i defter-i kassâm yirmi bin [akçe] muhallefâtı olmağın meblağ-ı mezbûrdan cedde müvekkilem merkūmeye isâbet eden südüs hissesine vaz‘-ı yed olan babası merkūm Ali Çelebi’den bi’l-vekâle taleb ederim suâl olunsun dedikde gıbbe’s-suâl mezkûr Ali Çelebi fi’l-hakīka müteveffât-ı mezbûre Emetullah’ın ber mûceb-i defter-i kassâm yirmi bin akçe terekesine vâzı‘ü’l-[yed] eylediğini ikrâr ve i‘tirâf etmeğin mûcebince meblağ-ı mezbûrdan mezbûre Fâtıma Hâtun’a isâbet eden südüs hisse-i şer‘iyyesini vekîl-i mezbûr Mehmed Çelebi’ye edâ ve teslîme merkūm Ali Çelebi’ye tenbîh olunup mâ vaka‘a bi’t-taleb ketb olundu. Fi’l-yevmi’l-hâdî aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Süleyman Çelebi b. Mahmud, Abdülkādir Çelebi b. ( ), Muharrem b. Abdi, Ramazan b. Ali.