Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 607 Hüküm no: 754 Orijinal metin no: [94b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Hızır’ın kendi reâyâsı olduğunu iddia ettiği Panayot v. Vasil’in Valide Sultan Vakfı reâyâsı olduğu Erbâb-ı timardan Mustafa Bey b. Hızır nâm kimesne meclis-i şer‘-i hatîr-i lâzımü’t-tevkīrde Panayot v. Vasil nâm zimmî muvâcehesinde üzerine da‘vâ ve takrîr-i kelâm edip merkūm Panayot vilâyet-i Rumeli’nde Kartine kazâsına tâbi‘ Lazta nâm karye ve gayrıdan berât-ı âlîşân ile mutasarrıf olduğum timarımın re‘âyâsından olmağla suâl olunup târih-i kitâb senesi üzerine edâsı lâzım gelen bir buçuk guruşun alıverilmesi murâdımdır dedikde gıbbe’s-suâl mezbûr Panayot cevâbında ben İstanbul’da Kumkapı hâricinde sâkin olup merhûme Vâlide Sultan vakfı re‘âyâsına kayd olup üzerime lâzım gelen ispençe ve sâir tekâlîfimi vakf-ı mezbûr tarafına edâ edegelmişizdir deyû mühürlü ve nişânlı sûret-i defter ibrâz edip mezbûr Mustafa Bey muvâcehesinde feth ve kırâat olundukda mazmûnu takrîr-i meşrûhuna mutâbık bilinip mezbûr Mustafa Bey dahi ikrâr etmeğin mûcebince bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’t-tâsi‘ min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: İbrahim Çelebi b. Ahmed, Hasan Çelebi b. Ahmed, Veli b. Mahmud, Resul b. Rıdvan.