Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 607 Hüküm no: 755 Orijinal metin no: [95a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’ın âzat edilmiş olduğunun tespiti Mahmiye-i İstanbul’da Ayasofya-i Kebîr kurbunda Üskübî mahallesi ahâlîsinden iken bilâ-vâris vefât eden Mehmed Ağa’ya hayâtında rıkkıyyetini mu‘terif olan bâ‘isü’l-kitâb uzun boylu, kara gözlü, kara kaşlı Macariyyü’l-asl Mustafa b. Abdullah tarafından husûs-ı âti’l-beyâna vekîl olduğu mahalle-i mezbûre sükkânından Halil Çelebi b. Hüseyin ve İbrahim Çelebi b. Mehmed ve Ali b. Abdullah nâm kimesneler şehâdetleri ile şer‘an sâbit olan el-Hâc Mustafa b. Ahmed nâm kimesne dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde müteveffâ-yı mezbûrun terekesinden olup beytülmâle âid olmak üzre müvekkil-i mezbûra vaz‘-ı yed edip şıkk-ı evvel defterdârı kāimmakāmı olan Emîrü’l-ümerâ’i’l-kirâm Mehmed Paşa mahzarında da‘vâ ve takrîr-i kelâm edip müteveffâ-yı mezbûr sıhhat ve nefâz-ı tasarrufâtında müvekkilim mevsûfe-i mezbûru i‘tâk edip hür olmuşken paşa-yı müşârün-ileyh rakīki olmak üzre bi gayrı hakkın vaz‘-ı yed eder suâl olunup kasr-ı yedine tenbîh olunup sebîli tahliyye olunmak matlûbumdur dedikde, gıbbe’s-suâl paşa-yı müşârün-ileyh müteveffâ-yı mezbûr mevsûf-ı mezbûru vech-i muharrer üzre i‘tâk eylediğini inkâr edicek vekîl-i mezbûrdan müdde‘âsını mübeyyine beyyine taleb olundukda mezbûrûn Halil Çelebi ve İbrahim Çelebi ve Ali li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffâ-yı mezbûr Ahmed Ağa sıhhat ve nefâz-ı tasarrufâtında vekîl-i mezbûrun müvekkili mevsûf-ı mezbûr Mustafa’yı bizim huzûrumuzda i‘tâk eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince mevsûf-ı mezbûrun hürriyetine hükm olunup sebîli tahliyye olunmağın mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Fahrü’l-eşbâh Mükerrem Ağa, fahrü’l-akrân Ali Bey, Halil Çelebi, Veli Ağa b. ( ), el-Hâc Mustafa Bevvâb-ı sultânî, fahrü’l-a‘yân Muvahhid? Mustafa Ağa, kapıcı İbrahim Çelebi b. Ahmed, Ali b. Yahya, Ali b. Hasan.