Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 611 Hüküm no: 768 Orijinal metin no: [95b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Fidan Beşe b. Abdullah’ın terekesinden Papasoğlu Hanı’ndaki kahvenin çocuklarının vasîsi tarafından teslim alındığı Mahmiye-i İstanbul’da Çavuş Mescidi mahallesinde sâkin iken bundan [akdem] vefât eden Fidan Beşe b. Abdullah nâm müteveffânın sulbî sagīr oğlu Süleyman ve sulbiye sagīre kızları Âişe ve Ümmühâni’nin tesviye-i umûrlarına kıbel-i şer‘-i enverden mansûbe vasîleri olan fahrü’l-muhadderât Âişe Hanım bt. Kasım Ağa nâm hâtun meclis-i şer‘-i şerîf-i Ahmedî ve mahfil-i dîn-i münîf-i Muhammedî’de takrîr-i kelâm ve ta‘bîr ani’l-merâm edip sıgār-ı mezbûrûnun babaları müteveffâ-yı mezbûrdan müntakil mahmiye-i mezbûrda Balkapanı kurbunda vâki‘ Papasoğlu hanı’nda on iki ferde kahvesi olmağla taraf-ı şer‘den üzerine varılıp yedimde olan fermân-ı âlî mûcebince vesâyetim hasebiyle ba‘de’l-vezn bana teslîm olunmak murâdımdır dedikde, savb-ı şer‘den mevlânâ Hasan Efendi irsâl olunup ol dahi zeyl-i rakīmde muharrerü’l-esâmî olan müslimîn ile zikr olunan hana varıp sâlifü’l-beyân on iki ferde kahveyi hân-ı mezbûrda ba‘de’l-vezn iki bin iki yüz yirmi sekiz buçuk vakıyye sâf kahveyi vasiyye-i mezbûre Âişe Hanım’a teslîm ol dahi kabz ve tesellüm eyledikden sonra husûs-ı mezbûru mevlânâ-yı mezbûr mahallinde tahrîr ba‘dehû ma‘an irsâl olan Süleyman ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb ve imlâ olundu. Fi’l-yevmi’s-sâmin ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Abdi Beşe b. Hamza, Cafer b. Abdullah, Osman Çavuş el-Mübâşir, Hüseyin Beşe b. Abdullah, Hasan Çelebi b. Receb, Hüseyin Çelebi b. Ali.