Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 612 Hüküm no: 770 Orijinal metin no: [95b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Agya v. Serevan’ın, Sarga v. Norsiz’de olduğunu iddia ettiği miras hissesini ispat edemediği Vilâyet-i Anadolu’da Sivas kazâsına tâbi‘ Kayabaşı nâm karyeden olup hâlâ mahmiye-i İstanbul’da ( ) mahallesinde sâkin Agya v. Serevan nâm Ermeni mahfil-i kazâda işbu bâ‘isü’s-sifr Sarga v. Norsiz nâm Ermeni muvâcehesinde üzerine da‘vâ ve takrîr-i kelâm edip dört hisseden bir hissesi benim ve bir hissesi mezbûr Sarga’nın ve iki hissesi Zehri bt. Bogazis nâm Ermeniye’nin mülkü olan on bin akçe kıymetli bir mâî teli mezbûr Sarga fuzûlen istihlâk etmekle suâl olunup kıymetinden hissesi olan yedi yüz elli akçenin mezbûr Sarga’dan alıverilmesi matlûbumdur dedikde, gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr Sarga’ya vech-i şer‘î üzre yemîn teklîf olundukda ol dahi yemîn billâhi’llezî enzele’l-İncîle alâ İsa -aleyhi’s-selâm- etmeğin mûcebince müdde‘î-i mezbûr bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Hacı Osman b. Mehmed, Mehmed Beşe b. Abdullah, ve diğer Mustafa, Abdi [b.] Ramazan, Mustafa b. ( ).