Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 612 Hüküm no: 771 Orijinal metin no: [95b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fazlullah Beşe’ye ait gemide çalışanların ücretleri ve taşıdıkları malın navlunu hususundaki davada sulh olduğu Mellâh tâifesinden Ali b. Mehmed ve Eyüb b. İslâm ve Abdullah b. Abdullah ve Ma‘den b. Ali ve Sadık b. Kara Ali nâm kimesneler meclis-i şer‘-i şerîf-i lâzımü’t-teşrîfde sefîne reislerinden bâ‘isü’l-kitâb Fazlullah Beşe b. Abdurrahman nâm kimesne mahzarında her biri ikrâr ve takrîr-i kelâm edip mezbûr Fazlullah Beşe’nin sefînesinde yoldaşlar olup emri ile medîne-i ( ) iskelesinde sefînesini yükletip İstanbul’a geldiğimizde her birimizin ecr-i misli olan yedi yüz akçeyi mezbûr Fazlullah Beşe’den taleb edip da‘vâ eylediğimizde mezbûr Fazlullah Beşe dahi medîne-i mezbûrda almış[lar]dır deyû sefîneye tahmîl ettiğimiz metâ‘ın navlunumla verin deyû da‘vâ ettiğinde beynimizde nizâ‘-ı küllî vâki‘ olmağın muslihûn tavassut edip mezbûr Fazlullah Beşe her birimize yüz seksen akçe vermek üzre beynimizde inşâ-i akd-i sulh ettiğinde biz dahi sulh-i mezbûru kabûl ve her birimiz bedel-i sulh-i mezbûru mezbûr Fazlullah Beşe yedinden tamâmen ahz u kabz edip husûs-ı mezbûra müte‘allik âmme-i da‘vâdan her birimiz Fazlullah Beşe’nin zimmetini ibrâ ve iskāt eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: İbrahim Beşe b. Receb el-Mübâşir, Veli b. Hamza, İbrahim Çelebi b. Ahmed, Hasan Çelebi b. Ahmed, Resul [b.] Rıdvan.