Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 613 Hüküm no: 772 Orijinal metin no: [95b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bostancılardan Bayezid Bey’in, aldanarak Andriye v. Kiryaki’den satın aldığı bostanın verimsiz çıkması üzerine iade edip parasını talebi Hadîka-i hâssa bostancılarından işbu bâ‘isü’l-kitâb haseki Bayezid Bey b. Ali meclis-i şer‘-i hatîr-i lâzımü’t-tevkīrde Andriye v. Kiryaki nâm zimmî muvâcehesinde üzerine da‘vâ ve takrîr-i kelâm edip arsasının senede Ayasofya-i Kebîr vakfı’na otuz akçe mukāta‘ası ve içinde mevcûd olan eşcârı mülk olup mahmiye-i İstanbul hısnı ebvâbından Yedikule kapısı hâricinde vâki‘ bir tarafdan arsa-i hâliye ve iki tarafdan debbâğlar yolu ve bir tarafdan tarîk-i âm ile mahdûd bir kıt‘a bostan merkūm Andriye’nin taht-ı tasarrufunda olup târih-i kitâbdan sekiz ay mukaddem mezbûr Andriye zikr olunan bostan için senede onar bin akçeye istîcâr ederler ve kıymeti bin beş yüz esedî guruşdur, al şu mülkü deyû beni mağrûr edip ben dahi mezbûrun tağrîrine binâen mârrü’z-zikr bostanı dokuz yüz esedî guruşa mezbûrdan mülk olmak üzre iştirâ edip yüz otuz esedî guruşu merkūm Andriye’ye def‘ ve teslîm ol dahi ahz u kabz etmişidi, mârrü’z-zikr bostanın arsası vakf olduğundan mâ‘adâ …? olup bir şey hâsıl olmamağla senede beş bin akçe ücret ile kimesne istîcâra tâlib olmayıp ve semen-i misli dahi ancak beş yüz guruş olmağın mezbûr Andriye’den suâl olunup ihkāk-ı hak olunması matlûbumdur dedikde gıbbe’s-suâl mezkûr Andriye cevâbında mârrü’z-zikr bostanı târih-i mezkûrda müdde‘î-i merkūm Bayezid Bey’e senede beş bin akçeye îcâr ederler deyû dokuz yüz otuz esedî guruşa bey‘ edip altı yüz otuz esedî guruşu yedinden alıp kabz eyledi[m] deyip vech-i meşrûh üzre merkūm Bayezid Bey bin beş yüz guruş ve geri senede on bin akçeye istîcâr ederler deyû tağrîr ettiğini inkâr edicek müdde‘î-i mezbûrdan müdde‘âsını mübeyyine beyyine taleb olundukda hadîka-i hâssa bostancılarından el-Hâc Ahmed b. Hüseyin ve Mehmed Bey b. Mustafa nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ târih-i mezkûrda merkūm Andriye zikr olunan bostan benim mülkümdür senede on bin akçeye istîcâr ederler ve kıymeti bin beş yüz esedî guruşdur al şu mülkü deyû bizim huzûrumuzda merkūm Bayezid Bey’i mağrûr edip ol dahi mezbûrun tağrîrine binâen dokuz yüz otuz esedî guruşa iştirâ etmişidi, biz bu husûsa bu vech üzre şâhidleriz [96a] şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sânî aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Mahmud b. Abdurrahman, Mustafa b. Abdi, Mustafa b. Ahmed, Hasan Efendi b. Mehmed.