Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 614 Hüküm no: 773 Orijinal metin no: [96a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Donanmada şehit olan Kayseri sancak beyi Mustafa Paşa’nın emanete alınan eşyalarının vârislerine verildiği Husûs-ı âti’l-beyânın mahallinde tahrîri iltimâs olunmağın kıbel-i şer‘-i enverden mevlânâ Mehmed Efendi b. İsmail irsâl olunup ol dahi Mehmed Ağa b. Receb’in mahmiye-i İstanbul’da Fîruz Ağa mahallesinde sâkin olduğu menziline varıp zeyl-i kitâbda muharrerü’l-esâmî olan müslimîn huzûrunda akd-i meclis ettikde sâbıkan ber vech-i arpalık Kayseriye sancağına mutasarrıf iken donanma-yı hümâyûnda şehîden fevt olan Mustafa Paşa b. Abdullah’ın verâseti zevce-i metrûkesi Fâtıma Hanım bt. Merdâne Ali Bey’e ve sulbî sagīr oğlu Seyyid Kamer Bey ile sulbiye sagīre kızı Şerîfe Fahrünnisâ Hanım’a münhasıra olduğu şer‘an zâhir ve mütehakkik oldukdan sonra kendi tarafından asîl olup sagīrân-ı mezbûrânın vâlideleri ve kıbel-i şer‘den mansûbe vasîleri olan mezbûre Fâtıma Hanım zâtını ma‘rifet-i şer‘iyye ile ârifân olan umdetü’l-mevâli’l-kirâm karındaşı es-Seyyid Abdülfettâh Efendi [b.] es-Seyyid Sâlih Efendi ve Mehmed Ağa b. Receb Ağa şehâdetleri ile sâbit oldukdan sonra meclis-i ma‘kūd-ı mezbûrda işbu râfi‘ü’l-kitâb Musli Ağa b. Abdullah mahzarında bi’l-vesâye ikrâr ve takrîr-i kelâm edip zevcim müteveffâ-yı merkūm Mustafa Paşa’nın eşyâ-i memlûkesinden hayâtında kethüdâsı Celeb Mahmud Ağa ve Mehmed Bey nâm kimesneler yediyle merkūm Musli Ağa’ya bi tarîki’l-vedî‘a def‘ ve teslîm ettiği al Londrine çukaya kaplı altı bin akçe kıymetli bir samur kontoş kürk ve yeşil sâye çukaya kaplı on bin akçe kıymetli bir samur kürk ve bir kırmızı kadife üzerine kaplama beş bin akçe kıymetli sîm eyer ve iki yüz akçe kıymetli altın yaldızlı bir köhne üzengi ve üç bin beş yüz akçe kıymetli iki sîm gaddâre ve beş yüz akçe kıymetli bir kırmızı kadife köhne değrek? ve iki yüz akçe kıymetli bir köhne kırmızı mak‘ad ve iki bin akçe kıymetli bir eski keçe ve altı yüz akçe kıymetli bir donluk kırmızı sof ve beş yüz akçe kıymetli bir kırmızı, köhne çakşır ve bin akçe kıymetli bir mâî atlas kaftan ve iki bin akçe kıymetli iki üst kaftanı ve yüz elli akçe kıymetli üç köhne makrama ve üç bin akçe kıymetli üç aded zırh ve yüz akçe kıymetli iki köhne bohça ve beş akçe kıymetli bir köhne sepet sandığı ve otuz akçe kıymetli bir gararı merkūm Musli Ağa yedinden asâlet ve vekâletim hasebiyle ahz u kabz eyledim dedikde gıbbe’t-tasdîk vâki‘ hâl mevlânâ-yı mezbûr mahallinde tahrîr edip ba‘dehû ma‘an irsâl olunan Mustafa b. el-Hâc Ahmed ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fî gurreti Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Fahrü’l-emsâl çorbacı İbrahim Ağa b. el-Hâc Hasan, es-Seyyid Abdullah Çelebi b. es-Seyyid Abdürrahim, Şaban b. Şaban, Süleyman b. Şahruh, Yusuf Bey b. Abdullah, Musli Bey b. Şaban, Ali b. Ahmed.