Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 615 Hüküm no: 774 Orijinal metin no: [96a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bosna Kadısı Mustafa Efendi’nin evinin üçte birini Ümmühani bt. Mustafa’ya, üçte birini ise Fâtıma Hatun’a bey‘ bi’l-istiğlâl yoluyla sattığı Mahmiye-i İstanbul’da Hoca Gıyaseddin mahallesi sâkinlerinden olup bi’l-fi‘l Bosna kadısı olan umdetü kuzâti’l-İslâm zübdetü vülâti’l-enâm el-Hâc Mehmed Efendi b. Hasan Efendi nâm kimesne, meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda mahmiye-i mezbûrda Arabacılar mahallesi sâkinelerinden Ümmühâni bt. Mustafa ile Fâtıma Hâtun taraflarından husûs-ı âti’l-beyâna nehc-i şer‘î ve tarîk-i mer‘î üzre sâbitü’l-vekâle vekîlleri olup mezbûre Ümmühâni’nin zevci ve merkūme Fâtıma’nın babası olan fahrü’l-akrân keşfî Mustafa Efendi b. Muharrem nâm kimesne mahzarında bi’t-tav‘i’s-sâf ikrâr ve i‘tirâf edip zikr olunan Hoca Gıyaseddin mahallesinde vâki‘ bir tarafdan keresteci Hacı Ahmed mülkü ve bir tarafdan tarîk-i âm ve iki tarafdan tarîk-i hâs ile mahdûd dâhiliyye ve hâriciyye fevkānî ve tahtânî büyût-ı adîdeyi müştemil mülk menzilimin sülüsânını iki yüz kıt‘a esedî guruşa müvekkile-i mezbûre Ümmühâni Hâtun’a ve sülüsünü dahi müvekkile-i mezbûre Fâtıma Hâtun’a bey‘ ve teslîm edip anlar dahi vech-i muharrer eslâsen iştirâ ve tesellüm eylediklerinden sonra mecmû‘-ı semenleri olan meblağ-ı mezbûr üç yüz esedî guruşun iki yüz guruşu müvekkile-i mezbûre Ümmühâni Hâtun yedinden tamâmen alıp kabz eyledikden sonra müvekkiletân-ı mezbûretân menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin kırk beş kıt‘a esedî guruşa bana îcâr ve teslîm ben dahi istîcâr ve kabûl ve tesellüm eyledim dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb ve imlâ olundu. Fi’l-yevmi’l-hâdî ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Umdetü’l-kuzât zübdetü’l-vülât İbrahim Efendi b. Cafer, mefharü’l-kuzât Çelebizâde Mehmed Efendi [b.] Abdülbâkī, fahrü’l-kuzât Mehmed Efendi b. el-Hâc İsmail, Ömer Efendi [b.] İsmail, Mehmed Çelebi b. Abdullah.