Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 619 Hüküm no: 784 Orijinal metin no: [96b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hasan’ın, Molla Hüsrev mahallesi avârızı için vakfedilen akçeden vakfa borçlu olduğu Mahmiye-i İstanbul’da Vefâ meydanı kurbunda Molla Hüsrev mahallesi avârızına mevkūf nukūdun bi’l-fi‘l mütevellîsi olan İbrahim Efendi b. Halil nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda Mehmed b. Hasan nâm kimesne mahzarında üzerine da‘vâ ve takrîr-i kelâm edip mezbûr Mehmed zimmetinde asl-ı mâl-ı vakf-ı mezbûrdan iki yüz otuz kıt‘a esedî guruş ve târih-i kitâba gelince üç senelik ribh-i şer‘îsinden doksan esedî guruş cem‘an üç yüz yirmi esedî guruş vardır, suâl olunup alıverilmesi matlûbumdur dedikde, gıbbe’s-suâl mezbûr Mehmed cevâbında kaziyye şerh ve beyân olduğu üzre olup vakf-ı mezbûra vech-i mübeyyen üzre üç yüz yirmi kıt‘a esedî guruş deyni olduğunu bi tav‘ihî ikrâr etmeğin alâ mûcebi ikrârihî meblağ-ı mezkûr üç yüz yirmi kıt‘a esedî guruşu mütevellî-i mezbûra edâ ve teslîme mezbûr Mehmed’e ba‘de’t-tenbîh mâ vaka‘a bi’t-taleb ketb olundu. Fi’l-yevmi’r-râbi‘ min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Himmet Çavuş b. Ebûbekir, Durdu Usta b. Himmet, Osman Beşe b. ( ), Şaban b. ( ), Mustafa b. İbrahim, Mehmed b. Mustafa.