Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 620 Hüküm no: 785 Orijinal metin no: [96b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mahmud b. Mahmud’un terekesinde kayıtlı Timurhan adlı câriyenin yarı parasının karısı Rabia bt. Mustafa tarafından ödendiğinin anlaşıldığı Mahmiye-i İstanbul’da Nahılbend mahallesinde sâkin iken bundan akdem vefât eden Mahmud b. Mahmud’un zevce-i metrûkesi Râbia bt. Mustafa nâm hâtun tarafından husûs-ı âti’l-beyâna vekîl olduğu mazmûnu müsbit hüccet ile sâbit olan Yusuf Ağa b. Mehmed nâm kimesne Dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i âlîde müteveffâ-yı mezbûrun li ebeveyn kız karındaşları vâriseleri Havva ve Safiye nâm hâtunlar taraflarından husûs-ı âti’l-beyâna vekîl olduğu kezâlik hüccet ile sâbit olan Ahmed b. Mustafa ve diğer Ahmed b. Mustafa mahzarında da‘vâ ve takrîr-i kelâm edip müteveffâ-yı mezbûr sıhhat ve nefâz-ı tasarrufâtında işbu orta boylu, gök elâ gözlü Rûsiyyetü’l-asl Timurhan bt. Abdullah nâm câriyenin nısfı müvekkilem için evvelce kırk altı buçuk esedî guruşa ve nısf-ı âharını dahi kendi için kırk altı buçuk guruşa mâlikinden iştirâ ve semenin kırk altı buçuk guruşu müvekkilemin malından ve kırk altı buçuk guruşu dahi kendi malından edâ edip hattâ müteveffâ-yı mezbûr sıhhat ve nefâz-ı tasarrufâtında kaziyye minvâl-i muharrer üzre olduğunu ikrâr dahi edip mevsûfe-i mezbûrenin nısfı şirâen müvekkile-i mezbûre Râbia Hâtun’un mülkü iken müvekkiletân-ı mezbûretân Havva ve Safiye cümlesi tereke-i müteveffâ-yı mezbûrdan olmak üzre vaz‘-ı yed ederler suâl olunup ihkāk-ı hak olunmak matlûbumdur dedikde, gıbbe’s-suâl vekîl-i mezbûr Ahmed müvekkilelerinin mevsûfe-i mezbûreye cümlesi tereke-i müteveffâ-yı mezbûrdan almak üzre vaz‘-ı yed ettiklerini ikrâr edip lâkin vech-i muharrer üzre müvekkile-i mezbûre Râbia Hâtun’un şirâen mülkü olduğunu inkâr edicek müdde‘î-i mezbûrdan müdde‘âsını mübeyyine beyyine taleb olundukda mahalle-i mezbûre sükkânından Receb b. Mehmed ve el-Hâc Mahmud b. Hacı Bayram nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr sıhhat ve nefâz-ı tasarrufâtında vech-i muharrer üzre mevsûfe-i mezbûre Timurhan’ın nısfını kendi için kırk altı buçuk guruşa iştirâ ve nısf-ı âharını zevcesi mezbûre Râbia için emriyle kırk altı buçuk guruşa mâlikinden iştirâ eylediverip semeninden kırk altı buçuk guruşunu müvekkile-i mezbûre Râbia Hâtun’un malından edâ ettiğini bizim huzûrumuzda ikrâr ve bizi işhâd etmiş idi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Umdetü’l-emâcid ve’l-ekârim Çavuşbaşı İsmail Ağa, umdetü erbâbi’t-tahrîr ve’l-kalem Ebûbekir Efendi Tezkireci-i evvel, mefharü erbâbi’t-tastîr ve’r-rakīm Mustafa Efendi Tezkireci-i sânî, umdetü’l-a‘yân Eyüb Ağa Kethüdâ-yı hazret-i efendi.