Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 621 Hüküm no: 786 Orijinal metin no: [96b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mosi v. Hayim’in, Todori v. İstati’ye parasını ödediği tosunları alması Mahmiye-i İstanbul’da kasab tâifesinden olup Ohri cemâ‘atinden olan Mosi v. Hayim nâm Yahudi meclis-i şer‘-i hatîr-i lâzımü’t-tevkīrde sürekçi tâifesinden Todori v. İstati nâm zimmî muvâcehesinde üzerine da‘vâ ve takrîr-i kelâm edip târih-i kitâbdan dört gün mukaddem merkūm Todori altmış altı baş kara sığır tosunun beş re’sini beşer esedî guruşa olmak üzre ve altmış re’sinin her biri yedişer buçuk esedî guruşa olmak üzre nısfını bana dört yüz yirmi yedi buçuk esedî guruşa bey‘, ben dahi minvâl-i muharrer üzre semeninden iki yüz esedî guruşunu edâ ve teslîm edip mezbûr Todori dahi ba‘de’l-kabz yirmi altı re’sini bana teslîm edip ben dahi tesellüm etmişidim, hâlâ semen-i mezbûrdan bâkī iki yüz yirmi yedi buçuk esedî guruşunu dahi mezbûr Todori’ye edâ ve teslîm edip meblağ-ı mezbûr için bâkī iki re’s tosunu dahi kabz etmek murâd ettiğimde, mezbûr Todori semen-i mezbûru kabz ve zikr olunan tosunları bana teslîmden imtinâ‘ eder, suâl olunup alıverilmesi matlûbumdur dedikde gıbbe’s-suâl merkūm Todori cevâbında kaziyye minvâl-i muharrer üzre olduğunu bi tav‘ihî ikrâr etmeğin mûcebince semen-i mezbûrdan bâkī iki yüz yirmi yedi buçuk esedî guruşu kabz ve zikr olunan iki re’s tosunu müdde‘î-i mezbûra teslîme mezbûr Todori’ye tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ-yı muhzırân, İbrahim Çelebi b. Ahmed, Hasan Çelebi b. Ahmed, Baba Resul [b.] Rıdvan