Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 622 Hüküm no: 788 Orijinal metin no: [97a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ahmed’in han odasını basıp kölelerini çalmak isteyenlerin bir köleyi yaraladığı Esirci tâifesinden olup mahmiye-i İstanbul’da Servi mahallesi sâkinlerinden Mehmed Çelebi b. Ahmed nâm kimesne Dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i âlîde mahmiye-i mezbûre hısnı ebvâbından Bahçekapısı kurbunda sâkin Hasan b. Bayram ve mahmiye-i merkūmede Esirkapanı’nda sâkin diğer Hasan b. Mehmed ve Hüseyin b. Hüseyin nâm kimesneler mahzarlarında üzerlerine da‘vâ ve takrîr-i kelâm edip mezbûrûn Hasan ve diğer Hasan ve Hüseyin ve gāibûn ani’l-meclis Mustafa ve diğer Hüseyin ve Bayram târih-i kitâb senesi Recebi’l-müreccebi’nin yirmi dokuzuncu gecesi ba‘de’l-işâ hân-ı mezkûrda vâki‘ odamı basıp abd-i memlûküm olan İvaz b. Abdullah’ı fi‘l-i şenî‘ kasdıyla çalıp âhar abd-i memlûküm olan Yusuf b. Abdullah râzı olmayıp kurtarmağla sol budunu kürde ile mezbûr Hüseyin vurup cerh eylemişdir, suâl olunup mûceb-i şer‘îsi icrâ olunmak murâdımdır dedikde, gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ricâl-i müslimînden Ahmed b. Abdullah ve Mehmed b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka leyle-i mezbûrda ba‘de’l-işâ mezbûrûn Hasan ve diğer Hasan ve Hüseyin ve gāibûn ani’l-meclis Mustafa ve diğer Hüseyin ve Bayram müdde‘î-i mezbûrun hân-ı mezbûrda olan odasını basıp abd-i memlûkü mezbûr İvaz’ı fi‘l-i şenî‘ kasdıyla çalıp ve mezbûr Yusuf râzı olmayıp kurtarmağla mezbûr Hüseyin kürde ile bizim huzûrumuzda merkūm Yusuf’un sol budunu vurup cerh etmişdir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fi’r-râbi‘ min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Umdetü’l-a‘yân Çavuşbaşı İsmail Ağa, Fahrü erbâbi’t-tahrîr ve’l-kalem Ebûbekir Efendi Tezkireci-i evvel, zübdetü ashâbi’t-tastîr ve’r-rakam Mustafa Efendi Tezkireci-i sânî, Eyüb Ağa b. Ahmed Kethüdâ-yı hazret-i efendi.