Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 623 Hüküm no: 789 Orijinal metin no: [97a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın, Bayram b. Abdullah’tan muhâlaa yoluyla boşandığı Mahmiye-i İstanbul’da Süleyman Paşa sarayı kurbunda sâkine Fâtıma bt. Abdullah nâm hâtun meclis-i şer‘-i şerîfde zevci işbu bâ‘isü’l-kitâb Bayram b. Abdullah nâm kimesne mahzarında ikrâr ve takrîr-i kelâm edip zevcim mezbûr Bayram zimmetinde mütekarrir ve ma‘kūdun-aleyh bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olup bir don ve bir gömlek vermek üzre merkūm Bayram ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Bey Kethüdâ-yı muhzırân, Baba Resul [b.] Rıdvan, İbrahim Çelebi b. Mehmed, Veli b. Tevekkül.