Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 623 Hüküm no: 790 Orijinal metin no: [97a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Murad’ın, Mehmed Bey b. Ahmed’den muhâlaa yoluyla boşandığı Mahrûse-i Galata mahallâtından Şahkulu mahallesinde sâkine Âişe bt. Murad nâm hâtun meclis-i şer‘-i şerîfde zevci Mehmed Bey b. Ahmed nâm kimesne tarafından hul‘-ı âti’l-beyâna tasdîka vekîl olduğu Mehmed Beşe b. Hüseyin ve Mustafa Beşe b. Murad şehâdetleriyle şer‘an sâbit olan Murtaza Bey b. Bâli nâm kimesne mahzarında ikrâr ve takrîr-i kelâm [edip] zevcim müvekkil-i mezbûr Mehmed Bey zimmetinde mütekarrir ve ma‘kūdun-aleyh üç bin akçe mehr-i müeccelimin bin akçesini yedinden ahz u kabz edip bâkī iki bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre merkūm Mehmed Bey ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Bey Kethüdâ-yı muhzırân, İbrahim Çelebi b. Mehmed, Baba Resul [b.] Rıdvan, Veli b. ( ).