Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 624 Hüküm no: 791 Orijinal metin no: [97a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Varnalı Şeyh Ahmed Ağa’nın, ölen Osman Ağa’ya borcunu ödemiş olduğunun tespiti Mahmiye-i İstanbul’da Hoca Rüstem mahallesi ahâlîsinden olup sâbıkan Türkmen Ağası umdetü’l-eşbâh Darendeli Şeyh Ahmed Ağa’nın oğlu ve tarafından husûs-ı âti’l-beyâna vekîl olduğu Mustafa Efendi b. Davud ve el-Hâc Ali Ağa b. Mustafa nâm kimesneler şehâdetleri ile şer‘an sâbit olan fahrü’l-akrân Zeynelâbidin Ağa meclis-i şerîfde bundan akdem peksimed emîni iken garb …? Ratye Cudi? nâm mevzi‘de vefât eden Osman Ağa’nın hayâtında kapı kethüdâsı olan Fazlullah Ağa b. Mehmed mahzarında takrîr-i kelâm ve ta‘bîr ani’l-merâm edip müvekkilim mûmâ-ileyh Şeyh Ahmed Ağa’nın müteveffâ-yı mezbûr Osman Ağa’ya deyni olmağla on bin esedî guruşunu âdemlerinden hâzır bi’l-meclis Mustafa Ağa b. Mehmed nâm kimesneye vilâyet-i Anadolu’da ( ) kasabasında teslîm edip ol dahi kabz ettikde meblağ-ı mezbûru deynim için Osman Ağa’ya teslîm eyle, eğer İstanbul’dan oraya gitmek lâzım olursa yoluna harçlık eyle deyû bin beş yüz guruşu ve müteveffâ-yı mezbûr Osman Ağa’ya peşîn vermek için ikişer yüz ellişer guruş kıymetli biri yağız ve biri kula iki re’s atları dahi mezbûr Mustafa Ağa’ya teslîm edip mezbûr Mustafa Ağa dahi alıp İstanbul’a geldikde meblağ-ı mezbûr on bir bin beş yüz guruş ve zikr olunan atları müteveffâ-yı mezbûrun hayâtında vekîli olan mezbûr Fazlullah Ağa’ya teslîm edip mezbûr Fazlullah Ağa dahi bi’l-vekâle ahz u kabz etmişdir suâl olunup takrîrleri tahrîr olunmak matlûbumdur dedikde evvelen mezbûr Mustafa Ağa’ya suâl olundukda kaziyye minvâl-i muharrer üzre olduğunu tasdîk ve tahkīk edip sâniyen mezbûr Fazlullah Ağa’ya suâl olundukda mezbûr Fazlullah Ağa cevâbında meblağ-ı mezbûr on bir bin beş yüz esedî guruşu vech-i mübeyyen üzre kabz etmişidim, lâkin zikr olunan atları mezbûr Mustafa Ağa bana teslîm etmeyip sâkin olduğum menzilin ahırına bağlayıp ba‘dehû mezbûr Osman Ağa’nın mevti haberi geldikde vasîsi İsmail Ağa müteveffâ-yı mezbûr Osman Ağa’nın terekesinden olmak üzre meblağ-ı mezbûru ve zikr olunan atları kabz ve atları âhara bey‘ etmişidi dedikde, mâ vaka‘a bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Fazlullah Ağa b. Mehmed, Mustafa b. Ahmed, Keşşâf Efendi el-Müderris, Kâtib Ali Çelebi b. Mehmed.