Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 625 Hüküm no: 792 Orijinal metin no: [97a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hüseyin Bey’in terekesinden karısı Âişe bt. Abdullah’a intikal eden hisse hususunda kardeşinin oğlu Ali Çelebi’nin açtığı davada iddiasını ispat edemediği Mahmiye-i İstanbul’da Muhsine Hâtun mahallesi sükkânından olup bundan akdem İstefe’de vefât eden Hüseyin Bey b. ( ) nâm kimesnenin verâseti zevce-i metrûkesi Âişe bt. Abdullah ile li ebeveyn karındaşı oğlu Ali Çelebi b. Mehmed Çavuş’a münhasıra olduğu şer‘an zâhir ve mütehakkik oldukdan sonra merkūm Ali Çelebi meclis-i şer‘-i hatîr-i lâzımü’t-tevkīrde bâ‘isetü’l-vesîka merkūme Âişe mahzarında üzerine da‘vâ ve takrîr-i kelâm edip mûrisim müteveffâ-yı mezbûrun muhallefâtından merkūme Âişe defter-i kassâmdan hâric üç yüz akçe kıymetli beş sahan ve yüz akçe kıymetli beş sahan ve yüz akçe kıymetli bir kapaklı tas ve altı yüz akçe kıymetli iki kumaş kaftan ve yüz elli akçe kıymetli iki kilim ve iki yüz akçe kıymetli iki Yanbolu kebesi ve iki yüz akçe kıymetli iki yorgan ve iki yüz akçe kıymetli bir beledî döşek ve elli akçe kıymetli bir köhne ayaklı sandığımı kabz etmişdir suâl olunup bana isâbet eden hisse-i şer‘iyyemîn alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ müteveffâ-yı mezbûrun terekesinden defter-i kassâmdan hâric eşyâ-i mezbûreyi ahz u kabz etmeyip müdde‘î-i mezbûrun bu vechile üzerinde hakkı olmadığına merkūme Âişe’ye yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince bilâ-beyyine bî-vech mu‘ârazadan merkūm Ali Çelebi men‘ olunup mâ hüve’l-vâki‘ bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: İbrahim Çelebi b. Mehmed, Hasan Çelebi b. Ahmed, Mehmed b. Ramazan, Hüseyin b. Abdullah.