Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 625 Hüküm no: 793 Orijinal metin no: [97b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hüseyin Bey’in, karısı Âişe’nin mehrini, terekeye el koyan kocasının yeğeni Ali Çelebi’den alması gerektiği Mahmiye-i İstanbul’da Muhsine Hâtun mahallesi sükkânından olup bundan akdem kasaba-i İstefe’de vefât eden Hüseyin Bey b. ( ) nâm kimesnenin verâseti zevce-i metrûkesi Âişe bt. Abdullah ile li ebeveyn karındaşı oğlu Ali Çelebi b. Mehmed Çavuş’a münhasıra olduğu şer‘an zâhir ve mütehakkik oldukdan sonra mezbûre Âişe meclis-i şer‘-i hatîrde tereke-i müteveffâ-yı mezbûr[a] vâzı‘ü’l-yed olan merkūm Ali mahzarında üzerine da‘vâ ve takrîr-i kelâm edip müteveffâ-yı mezbûr Hüseyin Bey zimmetinde mütekarrir ve ma‘kūdun-aleyh olan dört bin akçe mehr-i müeccelimi hâlâ terekesine vâzı‘ü’l-yed olan mezkûr Ali Çelebi’den taleb ederim suâl olunsun dedikde gıbbe’s-suâl mezkûr Ali Çelebi mezkûre Âişe müteveffâ-yı mezbûrun zevce-i metrûkesi olduğunu ikrâ[r], lâkin mehr-i mezbûr vech-i muharrer üzre dört bin akçe olduğunu ma‘lûmum değildir deyû inkâr edicek müdde‘iyye-i mezbûreden müdde‘âsını mübeyyine beyyine taleb olundukda udûl-i müslimînden olup mahalle-i mezbûr müezzini olan Mehmed Halîfe b. Mustafa ve Ali b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Hüseyin Bey bundan akdem mezbûre Âişe’yi bizim huzûrumuzda dört bin akçe mehr-i müeccel ile tezevvüc ve kabûl eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra meblağ-ı mezbûr dört bin akçe mehr-i müeccelden müteveffâ-yı mezbûrun hayâtında küllen veya ba‘zen ahz ve istîfâ veya hibe ve turûk-ı şer‘iyyeden bir tarîk ile müteveffâ-yı mezbûrun zimmetini ibrâ ve iskāt etmediğine merkūme Âişe’ye yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince müteveffâ-yı mezbûrun tereke-i vâfiyesinden meblağ-ı mezbûr dört bin akçeyi müdde‘iyye-i mezbûreye edâ ve teslîme merkūm Ali Çelebi’ye tenbîh olunup mâ vaka‘a bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: İbrahim Çelebi b. Mehmed, Hasan Çelebi b. Ahmed, Mehmed b. Ramazan, Hüseyin b. Abdullah.