Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 626 Hüküm no: 794 Orijinal metin no: [97b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdurrahman Efendi b. Osman’ın, Hasan Beşe b. Ahmed’e borcunu ödemiş olduğu Mahmiye-i İstanbul’da Samanviranı mahallesinde sâkin Hasan Beşe b. Ahmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Abdurrahman Efendi b. Osman nâm kimesne mahzarında üzerine da‘vâ ve takrîr-i kelâm edip mezbûr Abdurrahman Efendi zimmetinde beynimizde ma‘lûm yedimden müşterâ ve makbûz bir sâ‘at semeninden on sekiz esedî guruş hakkım vardır, hâlâ taleb ederim suâl olunsun dedikde gıbbe’s-suâl mezbûr Abdurrahman Efendi cevâbında fi’l-hakīka zikr olunan sâ‘at semeninden müdde‘î-i mezbûre on sekiz esedî guruş deynim olup benim dahi yedimden müşterâ ve makbûz bir çift zümrüd küpe semeninden müdde‘î-i mezbûr zimmetinde otuz dört esedî guruş hakkım olmağla meblağ-ı mezbûrun on altı guruşunu yedinden ahz u kabz edip meblağ-ı bâkī on sekiz guruşu zikr olunan sâ‘at semeninden zimmetimde hakkı olan on sekiz esedî guruşa takās edip ol dahi mukāssa ve kabûl eyledi deyû def‘le mukābele edicek gıbbe’l-istintâk mezbûr Hasan Beşe cevâbında kaziyye bâlâda tafsîli mürûr ettiği vech üzre olduğunu bi tav‘ihî ikrâr etmeğin mûcebince mezbûr Hasan Beşe bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Bey b. Abdullah, Hasan Çelebi b. Ahmed, İbrahim Çelebi b. Ahmed, Baba Resul b. Rıdvan, Mehmed b. Ramazan.