Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 627 Hüküm no: 795 Orijinal metin no: [97b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Nilüfer’in oğulları Avadik ve Hannan’a intikal eden tereke davasında anlaştıkları Mahmiye-i İstanbul’da Koca Mustafa Paşa kurbunda Hâcce Hâtun mahallesinde sâkine iken bundan akdem hâlik olan Nilüfer nâm nasrâniyenin verâseti sadrî oğlu Haçador’un sulbî kebîr oğulları Avadik ve Hannan ile sulbiye kebîre kızları Lusi ve Lal ve Sima’ya münhasıra olduğu şer‘an zâhir ve mütehakkik oldukdan sonra merkūme Avadik meclis-i şer‘-i şerîfde tereke-i hâlike-i mezbûreye vâzı‘ü’l-yed olan mezbûr Hannan muvâcehesinde ikrâr ve takrîr-i kelâm edip mahalle-i mezbûrda vâki‘ bir tarafdan ba‘zen tarîk-i hâs ve ba‘zen Musli Çelebi mülkü ve bir tarafdan Sisli nâm Ermeni mülkü ve bir tarafdan Serkis nâm Ermeni mülkü ve bir tarafdan ba‘zen Avanos ve ba‘zen Kirkor mülkleri ile mahdûd büyût-ı adîdeyi müştemil mülk menzilde hâlike-i mezbûre Nilüfer’in yirmi sekiz sehim hissesi olup sihâm-ı mezbûrdan bi’l-irsi’ş-şer‘î bana isâbet eden sekiz sehim hissem ile sâir evânî-i nühâsiyye ve gayr-ı nühâsiyye ism-i mal ıtlâk olunur hâlike-i merkūme terekesinden bana isâbet eden hisse-i şer‘iyyem mukābelesinde şerâit-i sıhhat-i sulhü hâvî tehârüc-i şer‘î tarîk üzre merkūm Hannan ile yirmi esedî guruşa sulh olup bedel-i sulh olan meblağ-ı mezbûr yirmi esedî guruşu merkūm Hannan yedinden tamâmen alıp kabz edip ba‘de’l-yevm tereke-i hâlike-i merkūmeye müte‘allika cemî‘ de‘âvâdan merkūm Hannan’ı ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Ali Bey b. Abdullah, Ahmed Çelebi b. Mustafa, Baba Resul b. Rıdvan.