Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 627 Hüküm no: 796 Orijinal metin no: [97b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Abdullah’ın, câriyesi Timurhan’ı âzat ettiğinin anlaşıldığı İşbu uzun boylu, açık kaşlı, elâ gözlü Macariyyetü’l-asl rıkkıyyet-i sâbıkasına mu‘terife bâ‘isetü’l-vesîka Timurhan bt. Abdullah meclis-i şer‘-i hatîrde rakīki olmak üzre kendiye vâzı‘atü’l-yed olan Âişe bt. Ali nâm hâtun mahzarında üzerine da‘vâ ve takrîr-i kelâm edip bundan akdem ben mezbûre Âişe Hâtun’un câriye-i memlûkesi olup mülkünde iken târih-i kitâbdan on beş gün mukaddem mezbûre Âişe Hâtun huzûr-ı müslimînde beni tahrîr ve i‘tâk eyledikden sonra işbu hâzır bi’l-meclis Ali b. Mehmed nâm kimesneye nefsimi tezvîc ol dahi tezevvüc eylemişdir hâlâ mezbûr Âişe Hâtun rakīki olmak üzre bana vaz‘-ı yed eder suâl olunup kasr-ı yed ve sebîlim tahliyye olunması matlûbumdur dedikde, gıbbe’s-suâl mezkûre Âişe Hâtun cevâbında mevsûfe-i mezkûre bundan akdem iznim ile nefsini mezbûr Ali’ye tezvîc etmişidi deyû mezbûr Ali’nin zevcesi olduğunu ikrâr ve lâkin mezbûr Ali vech-i muharrer üzre tahrîr ve i‘tâk ettiğini inkâr edicek müdde‘iyye-i mezbûreden müdde‘âsını mübeyyine beyyine taleb olundukda mahmiye-i İstanbul’da Ali Paşa-yı Atîk mahallesi sükkânından Muharrem Bey b. Ali ve Bayram b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mezbûre Âişe Hâtun mevsûfe-i mezkûre Timurhan mülkünde olduğu hâlde târih-i kitâbdan on beş gün mukaddem bizim huzûrumuzda tahrîr ve i‘tâk olunmuşidi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince mevsûfe-i mezkûreden kasr-ı yed edip sebîli tahliyye olunmasına merkūme Âişe Hâtun’a tenbîh olunup mâ vaka‘a bi’t-taleb ketb olundu. Fi’l-yevmi’s-sâbi‘ min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Abdi Çelebi b. Mehmed, İbrahim Çelebi b. Ahmed, Resul [b.] Rıdvan, Mehmed b. Ramazan.