Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 628 Hüküm no: 797 Orijinal metin no: [97b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahmine bt. Minas’ın, Ahmed Beşe’den muhâlaa yoluyla boşandığı Mahmiye-i İstanbul’da Çakır Ağa mahallesinde sâkine Şahmine bt. Minas nâm nasrâniye tarafından husûs-ı âti’l-beyâna vekîl olduğu Ali b. Abdullah ve Hacı Ahmed b. Abdullah nâm kimesneler şehâdetleri ile şer‘an vekâleti sâbit olan mezbûr Minas v. Agop nâm zimmî meclis-i şer‘-i hatîr-i lâzımü’t-tevkīrde müvekkile-i mezbûrenin zevci işbu râfi‘ü’l-kitâb Ahmed Beşe b. Abdullah mahzarında bi’l-vekâle ikrâr ve takrîr-i kelâm edip müvekkilem mezbûre Şahmine zevci merkūm Ahmed Beşe ile zimmetinde mütekarrir ve ma‘kūdun-aleyh olan iki bin akçe mehr-i müeccelimi ve nafaka-i iddet-i ma‘lûmem üzerlerine ve me’ûnet-i süknâsı dahi kendi üzerine olmak üzre müvekkile-i mezbûrenin eşyâ-i memlûkesinden zevci merkūm Ahmed Beşe’ye def‘ ve teslîm eylediği bir sîm kemer kuşak ve bir endişe bilezik ve bir al dârâyî kaftan ve bir benefşe çuka ferâce ve elli kıt‘a esedî guruş üzerlerine muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl ettikden sonra zevciyyete ve gayra müte‘allika âmme-i de‘âvâdan her biri âharın zimmetini ibrâ ve iskāt eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mustafa Çelebi b. İbrahim, Hüseyin Çelebi b. Ali, Abdi b. Ömer, İbrahim Çelebi b. Mehmed, Hasan Çelebi b. Ahmed.