Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 629 Hüküm no: 798 Orijinal metin no: [97b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mustafa b. Mehmed’den, kız kardeşinin oğullarına intikal eden yarım ev hissesinin borçları ve nafakaları için vasîleri tarafından satıldığı Mahmiye-i İstanbul’da Emîn Sinan mahallesinde sâkin iken bundan akdem fevt olan Mustafa b. Mehmed nâm kimesnenin li ebeveyn kız karındaşı olup sulbî sagīr oğulları İsmail ve Ahmed’in tesviye-i umûrlarına kıbel-i şer‘-i mutahhardan mansûbe vasîleri olan Râbia bt. Mehmed nâm hâtun meclis-i şer‘-i şerîfde işbu bâ‘isü’l-kitâb Mahmud Çelebi b. Receb nâm kimesne mahzarında ikrâr ve takrîr-i kelâm [edip] merhûme Nesli Hâtun vakfı’ndan mahalle-i mezbûrede vâki‘ bir tarafdan Mustafa Çelebi b. Bayram mülkü ve bir tarafdan Saka Mehmed mülkü ve bir tarafdan Hacı Ali mülkü ve bir tarafdan tarîk-i hâs ile mahdûd bir bâb tahtânî ve bir bâb fevkānî odayı ve kenîfi müştemil olup nısf-ı şâyi‘i sagīrân-ı mezbûrânın ve nısf-ı şâyi‘-i âharı dahi müteveffâ-yı mezbûrun zevce-i metrûkesi Sehergâh bt. Abdullah nâm hâtunun icâreteyn-i ma‘lûmeteyn ile tasarrufunda olan menzilden sagīrân-ı mezbûrân hisselerini zarûret-i nafakaları için mütevellîsi izni ve bedel-i misli dört bin beş yüz akçeye mezbûr Mahmud Çelebi’ye ferâğ ve tefvîz ol dahi tefevvuz ve kabûl eyledikden sonra meblağ-ı mezbûr dört bin beş yüz akçeyi mezbûr Mahmud Çelebi yedinden tamâmen ahz u kabz edip min ba‘d menzil-i mezbûrun nısf-ı şâyi‘i mezbûr Mahmud Çelebi’nin hakk-ı müfevvazıdır emsâli gibi mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mustafa Efendi b. ( ) el-İmâm, Yahya Çelebi b. ( ) el-Müezzin, el-Hâc Receb b. ( ), Hasan Efendi b. ( ), Mustafa Çelebi b. Bayram.