Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 629 Hüküm no: 799 Orijinal metin no: [97b-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nartones bt. Hannan’ın kendisini merdivenlerden atıp çocuğunun düşmesine sebep olan Markar v. Marat’a açtığı davada sulh olduğu Husûs-ı âti’l-beyânın mahallinde tahrîri iltimâs olunmağın savb-ı şer‘-i şerîfden irsâl olunan mevlânâ Mustafa Efendi b. ( ), Serkis v. Haçik nâm zimmînin mahmiye-i İstanbul’da Çadırcı Ahmed mahallesinde sâkin olduğu menziline varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf ettikde mezbûr Serkis’in zevcesi olup zâtını mahalle-i mezbûre sükkânından Markar v. Zifer? ve Haçador v. Yako nâm zimmîler ta‘rîfleriyle mu‘arrefe olan Nartones bt. Hannan nâm nasrâniye meclis-i ma‘kūd-ı mezbûrda işbu hâmilü’r-rakīm Markar v. Marat nâm zimmî muvâcehesinde ikrâr ve takrîr-i kelâm edip mezbûr Markar târih-i kitâbdan on yedi gün mukaddem kendi sâkin olduğu menzilde vâki‘ nerdübânından beni atıverip düşmek ile andan nâşî müstebînü’l-hilka bir cenîn [100a] vaz‘ etmişdim deyû bundan akdem merkūm Markar’dan mûceb-i şer‘îsini da‘vâ eylediğimde ol dahi inkâr etmişidi el-hâletü hâzihî muslihûn tavassut edip da‘vâ-yı mezkûrumdan merkūm Markar ile beynimizde altı bin altı yüz nakid râyic fi’l-vakt akçe üzerine sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûru merkūm Markar yedinden tamâmen alıp kabz edip husûs-ı mezbûra müte‘allika da‘vâdan mezbûru ibrâ ve iskāt eyledim dedikden sonra merkūme Nartones’in zevci merkūm Serkis dahi husûs-ı mezbûra müte‘allika da‘vâdan mezbûr Nartones’i ibrâ-i âm ile ibrâ ve iskāt etmeğin gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mustafa Çelebi b. İbrahim meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fî yevmi’s-sâbi‘ min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: İsa Efendi b. ( ) el-Müezzin, Hasan Beşe b. Abdullah, el-Hâc Ali b. ( ), Mustafa Çelebi b. Abdullah, Ramazan Beşe b. Hüseyin, Selim Beşe b. Mahmud, el-Hâc Hasan b. Hasan.