Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 630 Hüküm no: 800 Orijinal metin no: [98a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Kâmile Hatun bt. Abdullah’ın bazı ev eşyalarını âzatlı câriyesi Bedirmâh bt. Abdullah’a hibe ettiğinin tespit edildiği Mahmiye-i İstanbul’da Suhte Sinan mahallesinde sâkine iken bundan akdem vefât eden Kâmile bt. Abdullah nâm hâtunun verâseti zevc-i metrûkü Mehmed b. Abdullah nâm kimesne ile sadriye kebîre kızı Muammer bt. Abdullah nâm hâtuna münhasıra olduğu şer‘an zâhir ve mütehakkik oldukdan sonra merkūmân Mehmed ve Muammer meclis-i şer‘-i hatîrde müteveffât-ı mezbûrenin mu‘takası işbu bâ‘isetü’l-kitâb Bedirmâh bt. Abdullah nâm hâtun mahzarında her biri üzerine da‘vâ ve takrîr-i kelâm edip mûrisemiz müteveffât-ı mezbûre Kâmile Hâtun’un terekesinden mecmû‘u beş bin akçe kıymetli iki yorgan ve bir döşek ve bir leğen ve bir ibrik ve iki minder ve üç sahan ve iki tencere ve iki köhne kilim ve iki yan keçesi ve bir mor sof ferâce ve bir al tâbî kaftanı mezbûre Bedirmâh bi gayrı hakkın ahz u kabz etmişdir suâl olunup a‘yânı mevcûde ise a‘yânını bana teslîme, müstehlek ise kıymet-i şer‘iyyeleri olan meblağ-ı mezbûru bana zâmin olmak üzre tenbîh olunmak matlûbumdur dedikde, gıbbe’s-suâl merkūme Bedirmâh cevâbında zikr olunan eşyâyı müteveffât-ı mezbûre Kâmile Hâtun sıhhat ve nefâz-ı tasarrufâtında bana hibe-i sahîha-i şer‘iyye ile hibe ve teslîm ben dahi ittihâb ve kabz edip hattâ müteveffât-ı mezbûre sıhhat ve nefâz-ı tasarrufâtında bin yetmiş altı senesi Şevvâli’nin onuncu günü mahmiye-i mezbûr Mahmud Paşa mahkemesinde nâibü’ş-şer‘ olan Ali Efendi b. Üveys huzûrunda eşyâ-i mezbûreyi bana hibe ve teslîm ettiğini ikrâr edip hüccet olunmuşidi deyû mazmûnu min külli’l-vücûh takrîr-i meşrûhunu nâtıka ve nâib-i mûmâ-ileyhin hat ve hatmini hâviye ve târih-i mezbûr ile müverraha hüccet-i şer‘iyye ibrâz edip gıbbe’s-suâl mezbûrân Mehmed ve Muammer hüccet-i mezbûreyi inkâr etmeğin mezbûre Bedirmâh’dan mazmûn-ı hüccet-i mezbûreyi mübeyyine beyyine taleb olundukda zeyl-i hüccetde isimleri terkīm olunan müslimînden Hacı Mustafa b. Mehmed ve Rahmetullah b. Efendi b. Mustafa nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffât-ı mezbûre Kâmile sıhhat ve nefâz-ı tasarrufâtında eşyâ-i mezbûreyi merkūme Bedirmâh’a hibe ve teslîm edip mezbûre Bedirmâh dahi kabûl ve kabz ve tesellüm ettiğini bin yetmiş altı senesi Şevvâli’nin onuncu günü mahmiye-i mezbûrda nâibü’ş-şer‘ olan mûmâ-ileyh Ali Efendi huzûrunda ikrâr edip hüccet olunmuşdu, biz mazmûn-ı sıhhat-i mezbûreye bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince müdde‘iyân-ı merkūmân Mehmed ve Muammer bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Süleyman Çelebi b. Hasan, İbrahim Çelebi b. Ahmed, Resul b. Rıdvan, Mehmed b. Rıdvan.