Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 631 Hüküm no: 801 Orijinal metin no: [98a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha Hatun’un ölüm döşeğinde iken kiracısı olduğu vakıf evin tasarrufunu başkasına devretmesinin geçersiz olduğu Merhûm Mustafa Ağa nâm sâhibü’l-hayrın vakfı mütevellîsi olan râfi‘ü’l-kitâb Ali b. Abdullah nâm kimesne meclis-i şer‘-i şerîfü’t-teşrîfde vakf-ı mezbûrdan zikr-i âtî menzile vâzı‘atü’l-yed olan Meryem Hâtun bt. Ali mahzarında üzerine da‘vâ ve takrîr-i kelâm edip vakf-ı mezbûrdan olup mahmiye-i İstanbul’da Tercümân Yunus mahallesinde vâki‘ bir tarafdan tarîk-i hâs ve bir tarafdan tarîk-i âm ve iki tarafdan vakf-ı mezbûrdan olup Sâliha Hâtun ve Saraylı Hatice Hâtun tasarruflarında olan odalar ile mahdûd biri ocaklı ve biri ocaksız iki bâb tahtânî odaları ve havluyu müştemil menzilin icâre-i mu‘accele-i ma‘lûme ve yevmî iki akçe ücret-i müeccele ile mutasarrıfesi olan diğer Sâliha Hâtun maraz-ı mevtinde menzil-i mezbûrun hakk-ı tasarrufunu bedel-i ma‘lûm mukābelesinde mezbûre Meryem’e ferâğ ve tefvîz edip mezbûre Meryem dahi ba‘de’t-tefevvuz benden izin taleb ettikde ben dahi maraz-ı mezbûr ile marîza olduğunu bilmemek ile izin vermişdim suâl olunup ferâğ-ı mezbûr câiz olmamağla menzil-i mezbûru vakf için bana teslîme mezbûre Meryem’e tenbîh olunmak matlûbumdur dedikde, gıbbe’s-suâl mezbûre Meryem menzil-i mezbûr vech-i muharrer üzre vakf olup ferâğ-ı mezbûr müteveffât-ı mezbûrenin maraz-ı mevtinde olduğunu tâyi‘aten ikrâr etmeğin mûcebince menzil-i mezbûrdan kasr-ı yedine ve mütevellî-i mezbûra teslîme merkūme Meryem’e tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Recebi’l-ferd li sene seb‘a ve seb‘în ve elf. Şuhûdü’l-hâl: Umdetü’l-meşâyihi’l-kirâm Mustafa Efendi b. Yusuf, Ali b. Bâli, Eyüb Ağa Kethüdâ-yı hazret-i efendi, fahrü’l-müderrisîn Ahmed Efendi el-Keşşâf, Mahmud b. Rıdvan.