Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 632 Hüküm no: 802 Orijinal metin no: [98a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mallarının çalındığını iddia eden Aslan v. Yako’nun davasını ispat edemediği İzmir bâzirgânlarından olup mahmiye-i İstanbul’da Yenihan’da sâkin [olan] Aslan v. Yako nâm Yahudi meclis-i şer‘-i şerîf-i Ahmedî ve mahfil-i dîn-i münîf-i Ahmedî’de işbu bâ‘isü’l-kitâb berber tâifesinden Ebûbekir b. İsmail ve hammâl tâifesinden Abdülvehhâb b. Hacı Fazlullah ve hân-ı mezbûrun odabaşısı olan Hüseyin b. Dede nâm kimesneler mahzarlarında üzerlerine da‘vâ ve takrîr-i kelâm edip mezbûrûn Ebûbekir ve Abdülvehhâb ve Hüseyin târih-i kitâbdan yedi gün mukaddem hân-ı mezbûrda vâki‘ odamı fuzûlen açıp içinde olan eşyâmdan mecmû‘u iki bin sekiz yüz akçe kıymetli ipek ve iplik kenarlı dokuz keten gömleği ve her biri beşer yüz akçe kıymetli sekiz top keten bezi ve yüz akçe kıymetli sekiz saçaklı makrama ve ikişer yüz akçe kıymetli üç kılâbdanlı makrama ve iki yüz akçe kıymetli bir terpûş ve üç yüz akçe kıymetli beş buçuk zirâ‘ iki parça keten bezimi ve on altı buçuk esedî guruşumu ahz u kabz etmişlerdir, suâl olunup a‘yânı mevcûde ise a‘yânını bana teslîme, müstehlek ise kıymeti olanının kıymet-i şer‘iyyelerini ve misli olanının mislini bana zâmin olmak üzre mezbûrûna tenbîh olunmak matlûbumdur, dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müdde‘î-i mezbûrun vech-i muharrer üzre hân-ı mezbûrda olan odasını açmayıp ve içinde olan eşyâ-i mezbûresini ahz etmeyip elân eşyâ-i mezbûrenin a‘yânını müdde‘î-i mezbûra teslîm ya kıymeti olanının kıymet-i şer‘iyyelerini ve misli olanının mislini zamân üzerlerine lâzım olmadığına mezbûrûn Ebûbekir ve Abdülvehhâb ve Hüseyin’den her birine yemîn teklîf olundukda anlardan her biri alâ vefki’l-mes’ûl yemîn billâhi’l-alî etmeğin mûcebince müdde‘î-i mezbûr bilâ-beyyine mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, İbrahim Çelebi b. Ahmed, Hasan Çelebi b. Ahmed, Resul b. Rıdvan, Mehmed b. Ramazan.