Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 633 Hüküm no: 803 Orijinal metin no: [98a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Ağa b. Hızır’ın, ortağı Rizo’daki koyun eti bahasından olan alacağını tahsil ettiği Mahmiye-i İstanbul’da Kızıltaş mahallesi sükkânından Ömer Ağa b. Hızır nâm kimesne meclis-i şer‘-i şerîf-i lâzımü’t-teşrîfde kasab tâifesinden Rizo v. ( ) nâm zimmî tarafından husûs-ı âti’l-beyânı tasdîka sâbitü’l-vekâle vekîli olan Hasan Ağa b. Ömer nâm kimesne mahzarında bi tav‘ihî ikrâr ve takrîr-i kelâm edip müvekkil-i merkūm Rizo ile kasablık san‘atında şerîkler olup fesh-i akd-i şirket ettiğimizde ba‘de külli hesâb lahm-ı ganem semeninden bâkī mezbûr Rizo zimmetinde on yedi bin akçe hakkım zuhûr edip meblağ-ı mezbûru mukaddemâ merkūmdan taleb ve da‘vâ ettiğimde ol dahi edâdan imtinâ‘ etmeğin beynimizde münâza‘ât-ı kesîre vâkı‘a olmuşidi el-hâletü hâzihî muslihûn tavassut edip meblağ-ı mezbûr da‘vâsından merkūm Rizo ile beynimizde elli esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûru vekîl-i merkūm yedinden tamâmen ahz u kabz edip mâ‘adâdan müvekkil-i merkūm Rizo’nun zimmetini ibrâ-i âm ile ibrâ eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mustafa Efendi b. Ahmed, es-Seyyid Ömer b. Yusuf, Seyfullah b. Ömer, Süleyman Çelebi b. Hasan, Derviş b. Abdullah.