Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 634 Hüküm no: 805 Orijinal metin no: [98b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Hasan’ın, Ebûbekir Efendi’den muhâlaa yoluyla boşandığı Mahmiye-i İstanbul’da Hacı Hasanzâde Muhyiddin mahallesinde sâkine Hatice bt. Hasan nâm hâtun meclis-i şer‘-i şerîf-i lâzımü’t-teşrîfde zevci işbu bâ‘isü’l-kitâb Ebûbekir Efendi zimmetinde mütekarrir ve ma‘kūdun-aleyh olan bin beş yüz akçe mehr-i müeccelim ve nafaka-i iddet-i ma‘lûmem üzerlerine ve mezbûr Ebûbekir Efendi’nin firâşından mütevellid sulbî sagīr oğlu Mehmed’i yedi yaşına değin kendi malımdan teberru‘an infâk ve iksâ etmek üzre ve me’ûnet-i süknâm dahi kendi üzerime olmak üzre mezbûr Ebûbekir Efendi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl ettikden sonra zevciyyete müte‘allika da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min Recebi’l-mürecceb li sene seb‘a ve seb‘în ve elf. Şuhûdü’l-hâl: Mehmed Çelebi b. Mehmed, Hasan Beşe b. ( ) Çukadâr, Hüseyin Beşe b. Mustafa, Mehmed b. Mustafa.