Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 634 Hüküm no: 806 Orijinal metin no: [98b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Yusuf b. Göçbeyi’nin Ayasofya-i Kebir Vakfı’ndan kiraladığı ve küçük kızına kalan dükkânının yarım hissesinin küçük kızına kaldığı ve bedeli karşılığı kapıcıbaşı Yusuf Ağa’ya devrine izin verildiği Mahmiye-i İstanbul hısnı ebvâbından Zindankapısı dâhilinde vâki‘ bir tarafdan mîrî zindan ve bir tarafdan Yorgi zimmî tasarrufunda olan dükkân ve bir tarafdan yağcı Ali tasarrufunda olan dükkân ve bir tarafdan tarîk-i âm ile mahdûd olup Ayasofya-i Kebîr vakfı’ndan olan bir bâb dükkâna icâreteyn-i ma‘lûmeteyn ile mutasarrıf olan Yusuf b. Göçbeyi nâm kimesne bundan akdem fevt olup dükkân-ı mezbûr intikāl-i âdî ile sagīr oğlu Mustafa ve sagīre kızı Emetullah’a intikāl ettikden sonra sagīr-i mezbûr Mustafa bilâ-veled fevt olup dükkân-ı mezbûrdan nısf hisse-i şâyi‘asını mütevellî-i vakf için zabt edip dergâh-ı âlî kapıcıbaşılarından umdetü’l-emâsil ve’l-ekârim câmi‘ü’l-mecâlis ve’l-mekârim Yusuf Ağa b. Abdülmu‘în’e icâreteyn-i ma‘lûmeteyn ile îcâr ve teslîm ettiği şer‘an zâhir ve mütebeyyin oldukdan sonra dükkân-ı mezbûrdan sagīre-i mezbûrenin nısf hisse-i şâyi‘asını mûmâ-ileyh Yusuf Ağa bedel-i mislinin zı‘fı ile tefevvuza tâlib olup dükkân-ı mezbûrdan sagīre-i mezbûrenin hisse-i şâyi‘ası bedel-i mersûm ile tefvîz olunup alınan bedel sagīre için istirbâh olunmak her vechile sagīreye enfa‘ olduğu zeyl-i rakīmde muharrerü’l-esâmî olan müslimîn ihbârları [ile] müte‘ayyin oldukdan sonra dükkân-ı mezbûrdan sagīre-i mezbûrenin nısf hisse-i şâyi‘isini bedel-i mislinin zı‘fı ve izn-i mütevellî ile müşârün-ileyh Yusuf Ağa’ya ferâğ ve tefvîze sagīre-i mezbûrenin kıbel-i şer‘den mansûbe vasîsi ve âmmesi olan Ümmühâni nâm hâtuna taraf-ı şer‘-i enverden izin verilmeğin mâ vaka‘a bi’t-taleb [ketb] olundu. Fi’l-yevmi’r-râbi‘ aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Abdullah b. Mustafa, Bayram b. İbrahim, Ahmed b. Ebûbekir, Ali b. Mehmed, Ahmed b. Abdullah, Ahmed b. Mustafa.