Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 635 Hüküm no: 807 Orijinal metin no: [98b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Numanzâde Abdurrahman Efendi terekesinden bir evin Ahmed Efendi’ye satıldığı Mahmiye-i İstanbul’da bi’l-fi‘l şıkk-ı evvel defterdârı kāimmakāmı olan Emîrü’l-ümerâ’i’l-kirâm kebîrü’l-küberâi’l-fihâm Mehmed Paşa -dâme birruhû ve feşâ- dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i âlîde tavuk kâtibi olan bâ‘isü’l-kitâb Ahmed Efendi b. Halil tarafından husûs-ı âti’l-beyâna vekîl olduğu Sefer Beşe b. Hasan ve Mehmed Efendi b. Abdullah nâm kimesneler şehâdetleri ile şer‘an vekâleti sâbite olan Mehmed b. Osman nâm kimesne mahzarında ikrâr ve takrîr-i kelâm edip mahmiye-i mezbûrda Çoban Çavuş mahallesi ahâlîsinden olup sefer-i hümâyûnda bilâ-vâris vefât eden Numanzâde Abdurrahman Efendi’nin terekesinden olup mahalle-i mezbûrda vâki‘ bir tarafdan müvekkil-i mezbûr Ahmed Efendi mülkü ve bir tarafdan Hacı İbrahim mülkü ve bir tarafdan Çoban Çavuş vakfı ve bir tarafdan tarîk-i âm ile mahdûd iki bâb fevkānî ve dört bâb tahtânî odaları ve bir ahırı ve bi’r-i mâ’ ve kenîf ve havluyu müştemil menzil beytülmâl için kabz ettiğimden sonra menzil-i mezbûre[yi] yüz otuz bin akçeye bey‘ ve teslîm ol dahi müvekkil-i mezbûr Ahmed Efendi için iştirâ ve tesellüm ettikden sonra semen-i mezbûru yedinden tamâmen ahz ve kabz ettim min ba‘d menzil-i mahdûd-ı mezbûr müvekkil-i merkūm Ahmed Efendi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Emîrü’l-ümerâ ve’l-kirâm şıkk-ı sânî defterdârı Şaban Ağa, fahrü’l-eşbâh Hüseyin Ağa b. ( ) Reis, el-Hâc İbrahim b. ( ), Musa Efendi b. ( ) el-İmâm, Eylendi Hüseyin b. ( ).