Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 636 Hüküm no: 808 Orijinal metin no: [8b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye Hatun’un câriyesi Timurhan’ı âzat ettiği Mahmiye-i İstanbul’da Ayasofya-i Kebîr mahallesinde sâkine Râziye bt. ( ) nâm hâtun tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iyye ile ârifân olan Osman Çelebi b. Abdülkādir ve Nasrullah Efendi b. Ali nâm kimesneler şehâdetleri ile şer‘an sâbit olan el-Hâc Murtaza b. Hasan nâm kimesne meclis-i şer‘-i hatîr-i lâzımü’t-tevkīrde bi’l-vekâle ikrâr ve takrîr-i kelâm edip müvekkilem mezbûre Râziye Hâtun kendiye rıkkıyyetini mu‘terife olan orta boylu, açık kaşlı, kara gözlü Rûsiyyetü’l-asl bâ‘iset-i hâze’l-kitâb Timurhan bt. Abdullah nâm câriye-i memlûkesini hasbeten lillâhi’l-Hallâk tahrîr ve i‘tâk ve zümre-i harâir-i asliyyâta idrâc ve ilhâk eyledi ba‘de’l-yevm mevsûfe-i mezkûre Timurhan sâir harâir-i asliyyât hürre olup müvekkilem mezbûre Râziye Hâtun’un mevsûfe-i mezkûre üzerinde velâ-i şer‘îden gayrı hakkı kalmadı dedikde mâ hüve’l-vâki‘ bi’l-ibtigā ketb ve imlâ olunup yed-i tâlibe def‘ olundu. Fi’l-yevmi’s-sâlis aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Fazlullah Efendi [b.] Hasan, Hicâzî Süleyman Efendi el-İmâm, Mehmed Efendi [b.] Ebûbekir, Hasan b. Mehmed, Şaban b. Mustafa, Mehmed b. Ömer.