Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 636 Hüküm no: 811 Orijinal metin no: [98b-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye Hatun’un âzat ettiği köle ve câriyelere ev eşyası ve para vasiyet ettiği, vasiyetin yerine getirilmesine de Murtaza Çelebi’yi vasî tayin ettiği Mahmiye-i İstanbul’da Ayasofya-i Kebîr mahallesinde sâkine Râziye bt. ( ) nâm hâtun tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iyye ile ârifân olan Osman Çelebi b. Abdülkādir ve Nasrullah Efendi b. Ali nâm kimesneler şehâdetleri ile şer‘an sâbit olan İmâm Süleyman Efendi meclis-i şer‘-i hatîr-i lâzımü’t-tevkīrde bi’l-vekâle takrîr-i kelâm ve ta‘bîr ani’l-merâm edip müvekkilem mezbûre Râziye bi irâdeti’llâhi’l-meliki’l-müte‘âl dâr-ı dünyâdan sarây-ı bekāya intikāl eylediğinde mu‘takası Timurhan bt. Abdullah’a eşyâ-i memlûkesinden iki beledî yastık ve iki minder ve bir yemeni yorgan ve bir kırmızı velense ve bir alaca kilim ve bir tencere ve iki sahan ve bir baklava tepsisi ve bir top üskülü keten bezi ve diğer mu‘takası Şahbaz bt. Abdullah’a kezâlik iki beledî yastık ve iki minder ve bir yemeni yorgan ve bir kırmızı velense ve bir akça kilim ve bir tencere ve iki sahan ve bir baklava tepsisi ve bir top üskülü keten bezi ve mu‘takı Şahin b. Abdullah’a beş yüz akçe verile deyû vasiyyet ve bu vasiyyeti tenfîze işbu hâzır bi’l-meclis el-Hâc Murtaza Çelebi b. Hasan nâm kimesneyi vasiyy-i muhtâr nasb ve ihtiyâr edip ol dahi kabûl [ve] hizmet-i lâzımesini edâya ta‘ahhüd eyledi dedikde mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Es-Sâbikūn.