Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 637 Hüküm no: 812 Orijinal metin no: [98b-8] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Himmet’in, el-Hâc Şaban b. Maksud’dan muhâlaa yoluyla boşandığı Mahmiye-i İstanbul’da Pirincî Sinan mahallesinde sâkine Âişe bt. Himmet nâm hâtun meclis-i şer‘-i şerîfde zevci el-Hâc Şaban b. Maksud nâm kimesne mahzarında ikrâr ve takrîr-i kelâm edip zevcim mezbûr el-Hâc Şaban zimmetinde mütekarrir ve ma‘kūdun-aleyh bin beş yüz akçe mehr-i müeccelim ve nafaka-i iddet-i ma‘lûmem üzerlerine me’ûnet-i süknâm dahi kendi üzerime olmak üzre ve eşyâ-i memlûkemden bir don ve bir gömlek ve bir uçkur ve iki esedî guruş vermek üzre zevcim mezbûr el-Hâc Şaban ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl ettikden sonra zevciyyete ve gayra müte‘allika da‘vâdan her biriniz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Ahmed Efendi b. Mehmed, Musa Efendi b. Ebûbekir, Hasan Çelebi b. Ahmed, İbrahim Çelebi b. Mehmed, Veli Bey b. Mahmud.