Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 637 Hüküm no: 813 Orijinal metin no: [98b-9] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerife Fâtıma’nın babasından intikal eden terekeyi teslim aldığı Mahmiye-i İstanbul’da Bâli Ağa mahallesinde sâkin iken bundan akdem vefât eden el-Hâc Mehmed’in sulbiye kızı olup sin ve cüssesinin bülûğa tahammülü ve bülûğuna mu‘terife olan Şerîfe Fâtıma meclis-i şer‘de hâl-i sıgārında kıbel-i şer‘den mansûb vasîsi olan bâ‘isetü’l-kitâb Meryem bt. Ramazan nâm hâtun mahzarında ikrâr ve takrîr-i kelâm edip babam müteveffâ-yı mezbûr terekesinden olup bi hasebi’l-irsi’ş-şer‘î bana isâbet eden yetmiş esedî guruşu vasiyy-i mezbûr vesâyeti hasebiyle ahz u kabz etmişidi ben bâliğa ve rüşde nâile olmağla mezbûre Meryem Hâtun meblağ-ı mezbûrun on sekiz esedî guruşunu nafaka ve yirmi altı esedî guruşunu Âişe nâm hâtun zimmetinde olmağla mezbûreden ve yirmi altı esedî guruşunu dahi vâlidem Râbia Hâtun zimmetinde olmağla mezbûreden bana gösterip ben dahi kabûl eylediğimden sonra mezbûre Âişe Hâtun’dan meblağ-ı mezbûr yirmi altı esedî guruş mukābelesinde rehn aldığı bir çatma döşeği ve vâlidem mezbûr Râbia’dan rehn aldığı bir turuncî atlas kaftan ve bir çift inci küpe [73a] ve bir cild Yusufnâme kitâbı ve iki Türkî Hitâbe kitâbını bana teslîm edip ben dahi tesellüm eyledim ba‘de’l-yevm meblağ-ı mezbûr yetmiş esedî guruşdan mezbûr Meryem Hâtun yedinde bir akçe ve bir habbe hakkım kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Es-Seyyid Mehmed b. es-Seyyid Hasan, el-Keşfî Mustafa Efendi, Mehmed Bey b. Abdullah, İbrahim Çelebi b. Mehmed, Hasan Çelebi b. Ahmed.