Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 638 Hüküm no: 814 Orijinal metin no: [99a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Bey b. Derviş’in, zağferan bahasından Mehmed Beşe b. Ahmed’den alacaklı olduğu Mahmiye-i İstanbul’da Muhtesib Karagöz mahallesinde sâkin İbrahim Bey b. Derviş nâm kimesne meclis-i şer‘-i şerîf-i lâzımü’t-teşrîfde işbu bâ‘isü’l-kitâb Mehmed Beşe b. Ahmed nâm kimesne mahzarında üzerine da‘vâ ve takrîr-i kelâm edip mezbûr Mehmed Beşe’ye târih-i kitâbdan yedi ay mukaddem her dirhemi dörder akçeye olmak üzre bin iki yüz dirhem zağferan cem‘an dört bin sekiz yüz akçeye bey‘ ve teslîm edip ol dahi iştirâ ve kabûl ve kabz ettiğinden sonra bundan akdem meblağ-ı mezbûrun iki bin altı yüz kırk akçesini mezbûr Mehmed Beşe yedinden ahz u kabz edip bâkī iki bin sekiz yüz altmış akçe zimmetinde kalmışdır, suâl olunup alıverilmesi matlûbumdur dedikde gıbbe’s-suâl mezbûr Mehmed Beşe cevâbında fi’l-vâki‘ vech-i mübeyyen üzre müdde‘î-i mezbûr İbrahim Beşe’ye meblağ-ı mezbûrdan zimmetimde vâcibü’l-edâ ve lâzımü’l-kazâ iki bin yüz altmış akçe deynim vardır deyû bi tav‘ihî ikrâr ve i‘tirâf etmeğin alâ mûcebi ikrârihî meblağ-ı bâkī-i mezbûr iki bin yüz altmış akçeyi müdde‘î-i mezbûr İbrahim Beşe’ye edâ ve teslîm merkūm Mehmed Beşe’ye tenbîh birle mâ vaka‘a bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Ahmed Çelebi b. ( ), Mehmed Beşe b. Ramazan, Baba Resul b. Rıdvan, Veli Beşe b. Mahmud.