Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 639 Hüküm no: 815 Orijinal metin no: [99a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Mustafa’nın, Mustafa Çelebi b. Mehmed’den muhâlaa yoluyla boşandığı Mahmiye-i İstanbul’da Mustafa Paşa kurbunda Molla Hüsrev mahallesinde sâkine Sâliha bt. Mustafa tarafından husûs-ı âti’l-beyâna vekîl olduğu mahalle-i mezbûre sükkânından olup mezbûrenin zâtını ma‘rifet-i şer‘iyye ile ârifân olan Mustafa Çelebi b. Yusuf ve Hüseyin b. Yakub nâm kimesneler şehâdetleriyle şer‘an sâbit olan Mustafa Çelebi b. Abdurrahman nâm kimesne meclis-i şer‘-i hatîrde müvekkile-i mezbûrenin zevci bâ‘isü’l-kitâb hammâmî Mustafa Çelebi b. Mehmed nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûre Sâliha zevc-i merkūm Mustafa Çelebi zimmetinde mütekarrir ve ma‘kūdun-aleyh olan yirmi bin akçe mehr-i müeccel ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olmak üzre merkūm Mustafa Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika olan da‘vâdan her birisi âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mustafa Ağa b. Mehmed, Osman Ağa b. Mehmed, Mustafa Çelebi b. Ahmed, Hasan Çelebi b. Receb.