Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 639 Hüküm no: 816 Orijinal metin no: [99a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Bayram’ın, el-Hâc Hüseyin b. Mehmed’e açtığı alacak davasında anlaştıkları Vilâyet-i Anadolu’da vâki‘ Gönen kazâsına tâbi‘ Alâmetli nâm karyeden olup hâlâ mahmiye-i İstanbul’da Sırmakeş mahallesinde sâkin Mustafa b. Bayram nâm kimesne mahfil-i kazâda işbu bâ‘isü’l-kitâb el-Hâc Hüseyin b. Mehmed nâm kimesne mahzarında ikrâr ve takrîr-i kelâm edip müteveffâ babamdan intikāl etmekle mülküm olup karye-i mezbûrda vâki‘ lede’l-ahâlî ma‘lûmü’l-hudûd iki bin akçe kıymetli menzilimi mezbûr Hacı Hüseyin fuzûlen yıkıp taşını ve kerestesini ahz ve istihlâk etmekle menzil-i mezbûrun kıymetini ve yine karye-i mezbûrda vâki‘ babamdan intikāl eden bağımızı on seneden mütecâviz zabt ve mahsûlünü kabz etmekle mahsûl-i mezbûru ve yine mezbûr Hacı Hüseyin fuzûlen otuz top altınımı ahz ve istihlâk etmekle mislini mezbûr Hacı Hasan’ın müteveffâ babası on seneden mütecâviz beni istihdâm edip mezbûr Hacı Hüseyin tereke-i vâfiyesini kabz etmekle ecr-i mislimi taleb ve da‘vâ eylediğimde ol dahi benden mukaddemâ yedi müd buğday ahz u kabz etmişdin deyû da‘vâ etmekle münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip da‘vâ-yı mezbûrdan mezbûr Hacı Hüseyin ile beynimizde on esedî guruş üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr on esedî guruşu tamâmen ahz u kabz edip husûs-ı mezbûra müte‘allika âmme-i de‘âvâdan mezbûr Hacı Hüseyin’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Musli Beşe b. Mehmed, Mehmed Bey b. Hasan, Mehmed b. İlyas, Mehmed b. Osman, Mehmed Bölükbaşı.