Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 640 Hüküm no: 817 Orijinal metin no: [99a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın, kocası Mehmed b. Halil’den alacaklı olduğu iddiasını ispatlayamadığı Mahmiye-i İstanbul’da Canbâziye mahallesi sâkinelerinden Hatice bt. Abdullah nâm hâtun meclis-i şer‘-i şerîf-i lâzımü’t-teşrîfde zevci bâ‘isü’l-kitâb Mehmed b. Halil nâm kimesne mahzarında üzerine da‘vâ ve takrîr-i kelâm edip zevcim mezbûr Mehmed zimmetinde cihet-i karz-ı şer‘îden yüz yirmi esedî guruş hakkım olup taleb eylediğimde vermeden imtinâ‘ eder suâl olunup alıverilmesi matlûbumdur dedikde gıbbe’s-suâl ve’l-inkâr müdde‘iyye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müdde‘iyye-i mezbûre Hatice’ye yüz yirmi esedî guruş zimmetinde vâcibü’l-edâ deyni olmadığına mezbûr Mehmed’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘iyye-i mezbûre Hatice bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Hasan Çelebi b. Ahmed, İbrahim Çelebi b. Mehmed, Mustafa Çelebi b. Ahmed, Baba Resul b. Rıdvan.