Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 640 Hüküm no: 818 Orijinal metin no: [99a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çavuş b. Yusuf’un elindeki atın Hüseyin Beşe b. Ömer’e ait olduğunun tespiti İşbu bâ‘isü’l-kitâb Hüseyin Beşe b. Ömer nâm kimesne meclis-i şer‘-i hatîrde zikri âtî bârgire vâzı‘ü’l-yed olan Ali Çavuş b. Yusuf mahzarında üzerine da‘vâ ve takrîr-i kelâm edip işbu hâzır bi’l-meclis doru iğdiç bârgir mülkümde olduğu hâlde târih-i kitâbdan iki sene mukaddem mahrûse-i Edirne’de beylik selhhânede zâyi‘ olmuşidi, hâlâ mezkûrun yedinde buldum suâl olunup kasr-ı yed ve bana teslîme merkūm Ali Çavuş’a tenbîh olunması matlûbumdur dedikde, gıbbe’s-suâl mezkûr Ali Çavuş cevâbında mârrü’z-zikr bârgiri târih-i kitâbdan on ay mukaddem mahmiye-i İstanbul’da Atpazarı’nda ismi ma‘lûmum değil bir canbazdan yirmi beş esedî guruşa iştirâ ve kabz etmekle ana binâen vaz‘-ı yed ederim vech-i muharrer üzre müdde‘î-i merkūmun mülkü olup mülkünde olduğu hâlde zâyi‘ olduğu ma‘lûmum değildir deyicek, müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahmiye-i mezkûrede Bahçekapısı hâricinde vâki‘ beylik selhhânede sâkin İvaz Bey b. Muharrem ve Ramazan b. Yusuf nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu doru iğdiç bârgir müdde‘î-i mezbûrun mülkü olup târih-i kitâbdan iki sene mukaddem mahrûse-i mezbûrede vâki‘ beylik selhhânede mülkünde olduğu hâlde zâyi‘ etmişidi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle oldukdan sonra mârrü’z-zikr bârgiri âhara bey‘ veya hibe ve turûk-ı şer‘iyyeden bir tarîk ile mülkünden ihrâc etmediğine müdde‘î-i merkūma yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince mârrü’z-zikr bârgirden kasr-ı yed edip müdde‘î-i mezbûra teslîme merkūm Ali Çavuş’a tenbîh birle mâ vaka‘a bi’t-taleb ketb olundu. Fî gurreti Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: İbrahim Çelebi b. Mehmed, Hasan Çelebi b. Ahmed, Mehmed b. Ramazan, Resul b. Rıdvan.